ഡൽഹി വഖഫ് ബോർഡ് കള്ളപ്പണം വെളുപ്പിക്കൽ അന്വേഷണത്തിൽ ആം ആദ്മി പാർട്ടി (എഎപി) എംഎൽഎ അമാനത്തുള്ള ഖാനെതിരെ കുറ്റപത്രം സമർപ്പിച്ച് എൻഫോഴ്സ്മെൻ്റ് ഡയറക്ടറേറ്റ്. സെപ്റ്റംബർ രണ്ടിന് ഇ ഡി അറസ്റ്റ് ചെയ്ത അമാനുള്ള ഖാൻ നിലവിൽ ജുഡീഷ്യൽ കസ്റ്റഡിയിലാണ്. 110 പേജുള്ള അനുബന്ധ കുറ്റപത്രത്തിൽ ഇഡി അറസ്റ്റ് ചെയ്യാത്ത മറിയം സിദ്ദിഖിയെയും പ്രതിയാക്കിയിട്ടുണ്ട്.
ഡൽഹി വഖഫ് ബോർഡിൽ നിയമവിരുദ്ധമായി ജീവനക്കാരെ നിയമിച്ചതിലൂടെ അമാനുള്ള ഖാൻ വൻ തുക സമ്പാദിച്ചതായും തൻ്റെ അടുപ്പക്കാരുടെ പേരിൽ സ്ഥാവര സ്വത്തുക്കൾ വാങ്ങാൻ ഉപയോഗിച്ചുവെന്നുമാണ് കേസ്. 2018നും 2022നും ഇടയിൽ വഖഫ് ബോർഡിൻ്റെ ചെയർമാനായിരിക്കെ വഖഫ് ബോർഡിൻ്റെ വസ്‌തുക്കൾ പാട്ടത്തിന് നൽകിയും എഎപി നേതാവ് നേട്ടമുണ്ടാക്കിയെന്നും ഇഡി ആരോപിക്കുന്നു.
2024 ഏപ്രിലിലാണ്, ഏജൻസിക്ക് മുന്നിൽ ഹാജരാകാത്തത് ചൂണ്ടിക്കാട്ടിയാണ് അമാനത്തുള്ള ഖാനെതിരെ അറസ്റ്റ് വാറണ്ട് ആവശ്യപ്പെട്ട് ഇഡി കോടതിയെ സമീപിച്ചത്. കേസിൽ സഹകുറ്റാരോപിതരായ ദൗദ് നസീർ, സീഷൻ ഹൈദർ, ജാവേദ് ഇമാം സിദ്ദിഖി, കൗസർ ഇമാം സിദ്ദിഖി എന്നിവർക്കെതിരെ ജനുവരിയിൽ ഏജൻസി കുറ്റപത്രം സമർപ്പിച്ചിരുന്നു.
ഒന്നിലധികം എഫ്ഐആറുകളുടെ അടിസ്ഥാനത്തിലാണ് കള്ളപ്പണം വെളുപ്പിക്കൽ നിരോധന നിയമം (പിഎംഎൽഎ) പ്രകാരം അമാനത്തുള്ള ഖാനെതിരെ ഇഡി അന്വേഷണം നടത്തുന്നത്. ഡൽഹി വഖഫ് ബോർഡ് ചെയർമാനായിരിക്കെ അമാനത്തുള്ള ഖാൻ അടുപ്പക്കാർ നിയമിക്കുകയും നിയമനടപടികൾ മറികടന്ന് വ്യക്തിപരമായ നേട്ടങ്ങൾക്കായി ഒന്നിലധികം ക്രമക്കേടുകൾ നടത്തുകയും ചെയ്തതിന്റെ തെളിവുകൾ ഉണ്ടെന്നാണ് ഇ ഡി വാദിക്കുന്നത്. സെപ്റ്റംബർ രണ്ടിനാണ് ഓഖ്‌ലയിലെ വസതിയിൽനിന്ന് അദ്ദേഹത്തെ ഇ ഡി അറസ്റ്റ് ചെയ്തത്.