കോണ്‍ഗ്രസ് പ്രസിഡന്റ് തിരഞ്ഞെടുപ്പ് ഒക്ടോബര്‍ 17 ന് നടക്കും. ഡല്‍ഹിയില്‍ ചേര്‍ന്ന കോണ്‍ഗ്രസ് പ്രവര്‍ത്തക സമിതി യോഗത്തിലാണ് തീയതി തീരുമാനിച്ചത്. സെപ്റ്റംബര്‍ 30 വരെ നാമനിര്‍ദേശ പത്രിക സമര്‍പ്പിക്കാം. പ്രസിഡന്റ് സ്ഥാനത്തേയ്ക്ക് മത്സരമുണ്ടായാല്‍ വോട്ടെണ്ണല്‍ ഒക്ടോബര്‍ 19 ന് നടത്താനും തീരുമാനിച്ചിട്ടുണ്ട്.
2019 ലെ ലോക്‌സഭാ തിരഞ്ഞെടുപ്പ് പരാജയത്തിന് പിന്നാലെയായിരുന്നു രാഹുല്‍ ഗാന്ധിയുടെ കോണ്‍ഗ്രസ് പ്രസിഡന്റ് സ്ഥാനത്ത് നിന്നുള്ള രാജി. പിന്നീട് ഇടക്കാല അധ്യക്ഷയായി സോണിയ ഗാന്ധി ചുമതലയേറ്റെടുത്തു. അനാരോഗ്യം കാരണം രാജി സന്നദ്ധത അറിയിച്ചിരുന്നുവെങ്കിലും കോണ്‍ഗ്രസ് വര്‍ക്കിംഗ് കമ്മിറ്റി നേതാക്കള്‍ അധ്യക്ഷയായി തുടരാന്‍ സോണിയയോട് നിര്‍ബന്ധിക്കുകയായിരുന്നു.