ദീര്‍ഘദൂര ബ്രഹ്‌മോസ് മിസൈലിന്റെ വായുവില്‍ നിന്നുള്ള വിക്ഷേപണം വിജയകരമായി പരീക്ഷിച്ച് ഇന്ത്യന്‍ വായു സേന. സുഖോയ് യുദ്ധവിമാനത്തില്‍ നിന്ന് വിക്ഷേപിച്ച മിസൈല്‍ ബംഗാള്‍ ഉള്‍ക്കടലിലെ നിശ്ചയിച്ച ലക്ഷ്യസ്ഥാനമായ കപ്പല്‍ ഭേദിക്കാന്‍ മിസൈലിനായി. വിപുലീകരിച്ച പുതിയ മിസൈലിന് 400 കിലോമീറ്റര്‍ ദൂരെ വരെയുള്ള ലക്ഷ്യം ഭേദിക്കാന്‍ സാധിക്കുമെന്നാണ് വിലയിരുത്തല്‍.
പുതിയ പരീക്ഷണം വിജയിച്ചതോടെ സുഖോയ് വിമാനമുപയോഗിച്ച് കരയിലും കടലിലും അക്രമണം നടത്താന്‍ സാധിക്കുമെന്ന നേട്ടമാണ് ഇന്ത്യന്‍ വ്യോമസേന കൈവരിച്ചത്. വ്യോമ- നാവിക സേനകളും ഡിആര്‍ഡിഒ, ഹിന്ദുസ്ഥാന്‍ എയ്റോനോട്ടിക്സ് ലിമിറ്റഡ്, ബ്രഹ്‌മോസ് എയ്റോസ്പേസ് എന്നിവ സംയുക്തമായാണ് പരീക്ഷണം നടത്തിയത്.
ബ്രഹ്‌മോസ് മിസൈലിന്റെ വിപുലീകൃത റേഞ്ച് പതിപ്പിന്റെ ആദ്യ വിക്ഷപണമായിരുന്നു ഇത്
ഈ വര്‍ഷം മെയില്‍ സുഖോയ് യുദ്ധവിമാനത്തില്‍ നിന്ന് ബ്രഹ്‌മോസ് സൂപ്പര്‍സോണിക് ക്രൂസ് മിസൈലിന്റെ പുതിയ പതിപ്പ് ഇന്ത്യ വിജയകരമായി പരീക്ഷിച്ചിരുന്നു. 290 മുതല്‍ 350 കിലോമീറ്ററായിരുന്നു അതിന്‌റെ റേഞ്ച്. ഇതിനേക്കാള്‍ ഉയര്‍ന്ന റേഞ്ചിലുള്ള പരീക്ഷണമാണ് ഇന്ന് നടത്തിയത്. വായു, കര, കടല്‍ തുടങ്ങി മൂന്ന് മേഖലകളില്‍ നിന്നും വിക്ഷേപിക്കാന്‍ കഴിയുന്ന ഇന്ത്യ തദ്ദേശീയമായി വികസിപ്പിച്ചെടുത്ത മിസൈലാണ് ബ്രഹ്‌മോസ്.