ചന്ദ്രയാൻ 3 ദൗത്യത്തിലൂടെ ചന്ദ്രനിൽനിന്ന് ലഭിച്ചത് നിര്‍ണായക വിവരങ്ങളെന്ന് ഐഎസ്ആർഒ ചെയർമാൻ ഡോ. എസ് സോമനാഥ്. ചന്ദ്രയാൻ -3 കണ്ടെത്തിയ പലവിവരങ്ങളും ലോകത്തിന് തന്നെ ആദ്യത്തെ അറിവാണ്. ഇക്കാര്യങ്ങൾ ശാസ്ത്രജ്ഞരുടെ സംഘം കൂടുതൽ പരിശോധിച്ച ശേഷം പുറത്തുവിടുമെന്നും അദ്ദേഹം വ്യക്തമാക്കി.

''ചന്ദ്രയാന്‍ സമ്പൂര്‍ണമായി വിജയിച്ച ഒരു പദ്ധതിയാണ്. ഒരു തകരാറും ഇതുവരെ കാണാന്‍ സാധിച്ചിട്ടില്ല'' ഡോ. എസ് സോമനാഥ് പറഞ്ഞു.

ചന്ദ്രയാൻ -3 ലാന്‍ഡര്‍ ഇറങ്ങിയ സ്ഥലത്തിന് ശിവശക്തി എന്ന പേരിട്ടതില്‍ വിവാദം സൃഷ്ടിക്കേണ്ട ആവശ്യമില്ലെന്നും ഐഎസ്ആര്‍ഒ ചെയര്‍മാന്‍ പറഞ്ഞു .''ഇത്തരത്തില്‍ പേരിടല്‍ ആദ്യമായല്ല. വിവാദം സൃഷ്ടിക്കേണ്ട കാര്യമില്ല. വിശ്വാസവും ശാസ്ത്രവും രണ്ടും രണ്ടാണ്. പേരിടാന്‍ രാജ്യത്തിന് അധികാരമുണ്ട്'' -എസ് സോമനാഥ് പറഞ്ഞു.

ദക്ഷിണധ്രുവത്തിലേക്ക് പോകാൻ അമേരിക്ക, ചൈന, റഷ്യ അടക്കമുള്ള ഒരുപാട് രാജ്യങ്ങൾ ശ്രമിച്ചിട്ടുണ്ട്. എന്നാൽ അവർക്കൊന്നും അത് സാധിച്ചില്ല. നിരപ്പായ സ്ഥലം കണ്ടെത്തുക എന്നത് ദക്ഷിണധ്രുവത്തിൽ പ്രയാസകരമാണ്. ആനേട്ടം കൈവരിക്കാൻ ഇന്ത്യക്കായെന്നും അദ്ദേഹം പറഞ്ഞു.