ഡല്‍ഹിയില്‍ ഹോളി ആഘോഷത്തിനിടെ ആക്രമിക്കപ്പെട്ട സംഭവത്തിൽ പ്രതികരണവുമായി ജാപ്പനീസ് യുവതി. ഇന്ത്യയിലെ ഹോളി ആഘോഷത്തെ മോശമാക്കി കാണിക്കുക എന്ന ഉദ്ദേശത്തോടെ ആയിരുന്നില്ല വീഡിയോ ട്വീറ്റ് ചെയ്തതെന്ന് യുവതി പറയുന്നു. എന്നാൽ ഉണ്ടായ സംഭവങ്ങൾ നിർഭാഗ്യകരമാണെന്നും അവര്‍ പറഞ്ഞു. ''ഹോളിക്കിടെ ഒരു സ്ത്രീ തനിച്ച് പുറത്തിറങ്ങുന്നത് അപകടകരമാണെന്ന് പലരും പറഞ്ഞിരുന്നു. അതുകൊണ്ട് 35ഓളം സുഹൃത്തുക്കൾക്ക് ഒപ്പമാണ് അവിടെ പോയത്'' - കഴിഞ്ഞ ദിവസം ട്വിറ്ററിൽ പങ്കുവച്ച കുറിപ്പിൽ യുവതി പറഞ്ഞു.
കഴിഞ്ഞ ബുധനാഴ്ചയാണ് ഹോളി ആഘോഷത്തിനിടെ, വിദേശ യുവതിയെ ഒരു കൂട്ടം ആളുകൾ പിടിച്ചുവയ്ക്കുകയും ബലമായി കളർ തേയ്ക്കുകയും മോശമായി പെരുമാറുകയും ചെയ്തത്. ഇതിന്റെ ദൃശ്യങ്ങൾ സാമൂഹ്യ മാധ്യമങ്ങളിൽ വൈറലാവുകയും മൂന്ന് പേരെ കഴിഞ്ഞ ദിവസം ഡൽഹി പോലീസ് അറസ്റ്റ് ചെയ്യുകയും ചെയ്തിരുന്നു.
ഡൽഹിയിലെ പഹർഗഞ്ചിൽ നടന്ന ആഘോഷത്തിനിടെയായിരുന്നു സംഭവം. ഇതിന്റെ ദൃശ്യങ്ങൾ ട്വിറ്ററിൽ പങ്കുവച്ച യുവതി ഉടൻ തന്നെ അത് പിൻവലിക്കുകയും ചെയ്തിരുന്നു. വീഡിയോ പങ്കുവച്ച ഉടനെ വലിയ പ്രതികരണമാണ് ഉണ്ടായതെന്നും അതിൽ ഭയന്നാണ് ഡിലീറ്റ് ചെയ്തതെന്നും യുവതി പറഞ്ഞു. ''ഇന്ത്യയെ ഒരുപാട് ഇഷ്ടമാണ്. ഒരുപാട് തവണ സന്ദർശിട്ടുണ്ട്, വളരെ മനോഹരമായ രാജ്യമാണ്. ഇന്ത്യയും ജപ്പാനും എല്ലാ കാലത്തും സുഹൃത്തുക്കളായി തുടരും'' - ട്വീറ്റിൽ യുവതി പറയുന്നു.
"മാർച്ച് ഒൻപതിന് ഞാനൊരു ഹോളിയുടെ ദൃശ്യം ട്വീറ്റ് ചെയ്തിരുന്നു. അതിന് പിന്നാലെ പ്രതീക്ഷിച്ചതിലും അധികം മെസ്സേജുകളും ഷെയറുകളുമാണ് ഉണ്ടായത്. ഞാൻ ആകെ ഭയന്നു, അതുകൊണ്ടാണ് ഡിലീറ്റ് ചെയ്തത്" - ട്വിറ്ററിൽ യുവതി കുറിച്ചു. വെള്ളിയാഴ്ച ബംഗ്ലാദേശിലേക്ക് പോയ യുവതി ഇതുവരെയും പോലീസിലോ എംബസിയിലോ ഔദ്യോഗികമായി പരാതി നൽകിയിട്ടില്ല. വനിതാ കമ്മീഷന്റെ നിർദേശപ്രകാരമാണ് ഡൽഹി പോലീസ് നടപടി സ്വീകരിച്ചത്. അറസ്റ്റ് ചെയ്തവരിൽ പ്രായപൂർത്തിയാകാത്ത ഒരു യുവാവും ഉൾപ്പെടുന്നു. പ്രതികൾ കുറ്റം സമ്മതിച്ചതായി പോലീസ് പറഞ്ഞു.
ഇതുപോലുള്ള തെറ്റുകൾ ആവർത്തിക്കാതിരിക്കാൻ കൃത്യമായ നടപടികൾ ഉണ്ടാകുമെന്ന് പോലീസ് ഉറപ്പ് നൽകിയിട്ടുണ്ടെന്ന് യുവതി മറ്റൊരു ട്വീറ്റിൽ പറയുന്നു. സ്ത്രീകൾക്കെതിരായ ആക്രമണങ്ങൾ ക്രമേണ കുറയുമെന്ന് കരുതാമെന്നും അവര്‍ പ്രതീക്ഷ പ്രകടിപ്പിച്ചു.