പ്രധാനമന്ത്രി നരേന്ദ്രമോദി 2019 മുതല്‍ വിദേശയാത്രകള്‍ക്കായി ചെലവിട്ടത് 22.76 കോടി രൂപ. തുടര്‍ഭരണം ലഭിച്ചതിന് ശേഷം 21 തവണയാണ് മോദി വിദേശയാത്ര നടത്തിയത്.

2019 മുതൽ രാഷ്ട്രപതി എട്ട് വിദേശ യാത്രകളാണ് നടത്തിയത്. 6.24 കോടി രൂപ ഈ യാത്രകൾക്കായി ചെലവഴിച്ചതായി വിദേശകാര്യ സഹമന്ത്രി വി മുരളീധരൻ രാജ്യസഭയിൽ ഒരു ചോദ്യത്തിന് രേഖാമൂലം മറുപടി നൽകി. ഈ കാലയളവിൽ വിദേശകാര്യ മന്ത്രി എസ് ജയശങ്കർ 86 വിദേശ സന്ദർശനങ്ങൾ നടത്തി. ഇതിന് 20 കോടിയിലധികം രൂപയും ചെലവഴിച്ചു. 2019 മുതല്‍ പ്രധാനമന്ത്രി മൂന്ന് തവണ ജപ്പാനും രണ്ടു തവണ യുഎസും യുഎഇയും സന്ദര്‍ശിച്ചു.

രാഷ്ട്രപതിയുടെ സന്ദർശനങ്ങൾക്കായി 6,24,31,424 രൂപയും പ്രധാനമന്ത്രിയുടെ സന്ദർശനങ്ങൾക്കായി 22,76,76,934 രൂപയും വിദേശകാര്യ മന്ത്രിയുടെ സന്ദർശനത്തിനായി 20,87,01,475 രൂപയും 2019 മുതൽ സർക്കാർ ചെലവഴിച്ചെന്നാണ് കണക്കുകള്‍.

രാഷ്ട്രപതി നടത്തിയ എട്ട് വിദേശയാത്രകളില്‍ ഏഴ് യാത്രകളും നടത്തിയത് അന്നത്തെ രാഷ്ട്രപതി രാം നാഥ് കോവിന്ദാണ്. നിലവിലെ പ്രസിഡന്റ് ദ്രൗപതി മുര്‍മുവിന്റെ കഴിഞ്ഞ സെപ്റ്റംബറിലെ യുകെ സന്ദര്‍ശനം മാത്രമാണ് നിലവില്‍ നടത്തിയ വിദേശ യാത്ര.