കര്‍ണാടക നിയസഭാ തിരഞ്ഞെടുപ്പ് ഫലവുമായി ബന്ധപ്പെട്ട ടെലിവിഷന്‍ ചര്‍ച്ചയ്ക്കിടെ വ്യക്തിപരമായി അധിക്ഷേപിച്ച ബിജെപി ഐടി സെല്‍ കണ്‍വീനര്‍ അമിത് മാളവ്യയ്ക്ക് പരിഹാസത്തിലൂടെ മറുപടി നല്‍കി അവതാരകന്‍ രജ്ദീപ് സര്‍ദേശായി. ഇന്ത്യാ ടുഡേ ചാനലിന്റെ ചര്‍ച്ചയ്ക്കിടയിലായിരുന്നു ഇരുവരും തമ്മിലുള്ള വാഗ്വാദം.അമിത് മാളവ്യയുടെ വ്യക്തിപരമായ അധിക്ഷേപത്തിന് പകരമായി മൈസൂര്‍ പാക്ക് കൊടുത്തയക്കാമെന്നായിരുന്നു സര്‍ദേശായിയിയുടെ മറുപടി.
കര്‍ണാടകയിലെ പരാജയത്തെ കുറിച്ച് ചോദ്യം ചോദിച്ച രജ്ദീപിനോട് കര്‍ണാടകയില്‍ ഹിജാബ്, ഹലാല്‍ വിഷയങ്ങള്‍ തോല്‍വിക്ക് കാരണമായെന്ന് ചൂണ്ടിക്കാട്ടുന്നത് നിങ്ങളുടെ പ്രൊപ്പഗണ്ടയാണ് എന്നായിരുന്നു അമിത് മാളവ്യ നല്‍കിയ മറുപടി. ''നിങ്ങളൊരു പ്രൊപ്പഗണ്ടിസ്റ്റാണ്. 2024ല്‍ ബിജെപി എങ്ങനെ വിജയിച്ചു എന്ന മൂന്നാമത്തെ പുസ്തകം എഴുതാന്‍ തയ്യാറായിക്കോളൂ. നിങ്ങള്‍ മാധ്യമപ്രവര്‍ത്തനത്തില്‍ നിന്ന് വിരമിക്കണം. സോണിയാ ഗാന്ധിയുടെ കാലുപിടിച്ച് ഒരു രാജ്യസഭാ സീറ്റ് തരപ്പെടുത്തൂ'' ഇതായിരുന്നു മാളവ്യയുടെ പരാമര്‍ശം .
ആക്ഷേപം വ്യക്തിപരമായതോടെ അവതാരകന്‍ ചുട്ടമറുപടി നല്‍കി. ''നിങ്ങള്‍ വ്യക്തിപരമായി അധിക്ഷേപിച്ചപ്പോഴെല്ലാം ഞാന്‍ ചിരിക്കുകയായിരുന്നു. വാജ്പേയിയുടേയും അദ്വാനിയുടേയും പാര്‍ട്ടിക്കാരനാണ് താങ്കള്‍. തോല്‍വിയുണ്ടായാലും ചിരിക്കുന്നവരായിരുന്നു അവര്‍. വ്യക്തി വിദ്വേഷമായി ചര്‍ച്ചയിലെ പരാമര്‍ശത്തെ മാറ്റരുത്. എന്നെ വിരട്ടാനും നോക്കണ്ട. ഒരു നല്ല ദിനം നേരുന്നു. താങ്കള്‍ക്ക് ഞാന്‍ മൈസൂര്‍ പാക്ക് അയച്ചുതരാം. ഇത് എന്റെ വാഗ്ദാനമാണ്. പകരം നിങ്ങളെനിക്ക് യുപിയിലെ ലഡ്ഡു അയച്ചുതരൂ'' - സര്‍ദേശായി പറഞ്ഞു.