ഡൽഹിയിലെ ജാമിയ നഗറിൽ സഹോദരങ്ങളായ കുട്ടുകള്‍ മരിച്ച നിലയിൽ കണ്ടെത്തി. സഹോദരങ്ങളായ എട്ടു വയസുകാരൻ നീരജ്, ആറു വയസ് പ്രായമുള്ള സഹോദരി ആർതി എന്നിവരുടെ മൃതദേഹം തടികൊണ്ട് നിർമ്മിച്ച പെട്ടിക്കുള്ളിൽ നിന്നാണ് കണ്ടെടുത്തത്. കുട്ടികളെ കാണാതായി ഏതാനും മണിക്കൂറുകൾക്കുള്ളിൽ നടത്തിയ തിരച്ചിലിലാണ് മൃതദേഹം കണ്ടെടുത്തത്.

കുട്ടികളും മാതാപിതാക്കളും താമസിക്കുന്ന വീട്ടില്‍ നിന്ന് തന്നെയാണ് മൃതദേഹങ്ങള്‍ കണ്ടെത്തിയത്. ഇതേ വീടിന്റെ മേല്‍നോട്ടക്കാരനായി ജോലി ചെയ്യുകയാണ് കൊല്ലപ്പെട്ട കുട്ടികളുടെ പിതാവ് ബൽവീർ. മാതാപിതാക്കളോടൊപ്പം ഉച്ചയ്ക്ക് ഭക്ഷണം കഴിച്ച കുട്ടികളെ അര മണിക്കൂറിനുള്ളിൽ കാണാതാവുകയായിരുന്നു. രക്ഷിതാക്കളും സമീപവാസികളും ചേർന്ന് തിരച്ചിൽ നടത്തിയെങ്കിലും പെട്ടിക്കുള്ളിൽ നിന്ന് മൃതദേഹം കണ്ടെത്തുകയായിരുന്നു.

കുട്ടികളുടെ ശരീരത്തിൽ മുറിവുകളൊന്നും കണ്ടെത്തിയിട്ടില്ല അതിനാൽ അബദ്ധത്തിൽ പെട്ടിക്കുള്ളിൽ അകപ്പെട്ട് ശ്വാസം മുട്ടി മരണം സംഭവിച്ചതാകാമെന്നാണ് ഡൽഹി പോലീസിന്റെ നിഗമനം.