പ്രളയം പ്രമേയമായ 2018 എവരിവൺ ഹീറോ സിനിമയുടെ തിരക്കഥാകൃത്തും നോവലിസ്റ്റുമായ അഖിൽ പി ധർമജന് തിരുവനന്തപുരത്ത് കഴിഞ്ഞദിവസമുണ്ടായ വെള്ളക്കെട്ടിൽ പാമ്പുകടിയേറ്റു. .

പുതിയ ചിത്രത്തിന്റെ തിരക്കഥ രചനയ്ക്കായി തിരുവനന്തപുരം വെള്ളയാണിയിൽ എത്തിയതായിരുന്നു അഖിൽ. എന്നാൽ ശനിയാഴ്ചയിൽ അപ്രതീക്ഷിതമായി ഉണ്ടായ കനത്ത മഴയിൽ അഖിൽ താമസിച്ചിരുന്ന വീട്ടിനടുത്തേക്ക് വെള്ളം കയറുകയായിരുന്നു.

പിന്നീട് അവിടെ നിന്ന് സുരക്ഷിതസ്ഥലത്തേക്ക് മാറുന്നതിനിടെയാണ് വെള്ളക്കെട്ടിലുണ്ടായിരുന്ന പാമ്പ് അഖിലിനെ കടിച്ചത്. മൂർഖൻ പാമ്പാണ് കടിച്ചതെങ്കിലും വെള്ളത്തിൽ നിന്നായതിനാൽ പരുക്ക് കാര്യമായുണ്ടായില്ലെന്ന് അഖിൽ പറഞ്ഞു. തിരുവനന്തപുരത്തെ സ്വകാര്യ ആശുപത്രിയിൽ ചികിത്സ തേടിയ അഖിൽ ആരോഗ്യസ്ഥിതി ഗുരുതരമല്ലെന്നും ഭയപ്പെടാനില്ലെന്നും ഫേസ്ബുക്കിൽ പങ്കുവച്ച കുറിപ്പിൽ പറഞ്ഞു.

ഞായറാഴ്ച്ച പുലർച്ചെ നാല് കഴിഞ്ഞ് പട്ടി കുരയ്ക്കുന്നത് കേട്ട് ഉണർന്നപ്പോഴാണ് വീട് ഏറെക്കുറെ മുങ്ങിയ അവസ്ഥയിലാണെന്ന് മനസിലായതെന്നും അടുത്തുള്ള ആളുകൾ ഭൂരിഭാഗവും ക്യാമ്പിലേക്ക് പോയിക്കഴിഞ്ഞിരുന്നെന്നും അഖിൽ ഫേസ്ബുക്ക് പോസ്റ്റിൽ വ്യക്തമാക്കി.

കഴിഞ്ഞ ദിവസമുണ്ടായ കനത്ത മഴയിൽ തിരുവനന്തപുരത്തിന്റെ പലഭാഗങ്ങളും വെള്ളിത്തിലായിരുന്നു. അതേസമയം ഒക്ടോബർ 18വരെ കേരളത്തിന്റെ പലഭാഗങ്ങളിലും ശക്തമായ മഴയുണ്ടാകുമെന്നാണ് വിലയിരുത്തപ്പെടുന്നത്.

തെക്കൻ തമിഴ്നാട്ടിൽ രൂപപ്പെട്ട ചക്രവാതച്ചുഴിയാണ് ശക്തമായ മഴയ്ക്ക് കാരണമെന്നാണ് വിലയിരുത്തുന്നത്. തീരപ്രദേശങ്ങളിൽ ശക്തമായ വേലിയേറ്റങ്ങൾ ഉണ്ടാകാൻ സാധ്യതയുള്ളതായും മലയോര ജില്ലകളിൽ മണ്ണിടിച്ചിലിനും വെള്ളപ്പൊക്കത്തിനും സാധ്യതയുള്ളതായും സർക്കാർ മുന്നറിയിപ്പ് നൽകിയിട്ടുണ്ട്.