ജീവിതം സമരമാക്കിയ കേരളത്തിന്റെ വിപ്ലവകാരി വിഎസിന്റെ ജീവിത കഥ 'ഒരു സമര നൂറ്റാണ്ട്' മുഖ്യമന്ത്രി പിണറായി വിജയന്‍ പ്രകാശനം ചെയ്തു. വിഎസിന്റെ നൂറാം ജന്മ ദിനത്തില്‍ തിരുവനന്തപുരം അയ്യൻ‌കാളി ഹാളിൽ നടന്ന ചടങ്ങില്‍ പ്രശസ്ത ചലച്ചിത്രകാരന്‍ ഷാജി എന്‍ കരുണ്‍ മുഖ്യമന്ത്രിയില്‍നിന്ന് പുസ്തരം ഏറ്റുവാങ്ങി. വിഎസിന്റെ മുന്‍ പ്രസ് സെക്രട്ടറിയും സംസ്ഥാന വിവരാവകാശ കമ്മീഷണറുമായിരുന്ന കെ വി സുധാകരനാണ് പുസ്തകം രചിച്ചത്.
പൊതുരംഗത്തുള്ളവര്‍ നൂറ് വയസ് വരെ എത്തുന്നതും, നൂറ് വര്‍ഷത്തിനിടയില്‍ സജീവമായി നില്‍ക്കുകയെന്നതും വളരെ അപൂര്വംപിണറായി വിജയന്‍
എട്ട് പതിറ്റാണ്ടുകളിലേറെ നീളുന്ന രാഷ്ട്രീയ ജീവിതത്തിന്റെ വികാസ പരിണാമങ്ങളാണ് 'ഒരു സമര നൂറ്റാണ്ട്' എന്ന പുസ്‌കത്തില്‍ പ്രതിപാദിച്ചിട്ടുള്ളതെന്ന് മുഖ്യമന്ത്രി പിണറായി വിജയന്‍ പറഞ്ഞു. സാധാരണ പൊതുരംഗത്തുള്ളവര്‍ നൂറ് വയസ് വരെ എത്തുന്നതും, നൂറ് വര്‍ഷത്തിനിടയില്‍ സജീവമായി നില്‍ക്കുകയെന്നതും വളരെ അപൂര്‍വമാണെന്നും മുഖ്യമന്ത്രി കൂട്ടിച്ചേര്‍ത്തു. വിഎസിന്റെ ജീവിതവും രാഷ്ടീയ നേതാവിലേക്കുള്ള ചുവട് മാറ്റവും വിഎസ് എന്ന ഭരണാധികാരിയെയും ദീര്‍ഘമായി വിവരിച്ചുകൊണ്ടായിരുന്നു മുഖ്യമന്ത്രിയുടെ പ്രസംഗം.
പിറന്നാള്‍ ദിനത്തില്‍ തിരുവനന്തപുരം ബാള്‍ട്ടണ്‍ ഹില്ലിലെ വിഎസിന്റെ വേലിക്കകത്ത് വീട്ടില്‍ സന്ദര്‍ശിച്ച ശേഷമായിരുന്നു മുഖ്യമന്ത്രി പിണറായി വിജയന്‍ പുസ്തക പ്രകാശനത്തിനായി എത്തിയത്. വിഎസിന്റെ ജീവിതം പലരും എഴുതിയിട്ടുണ്ടെങ്കിലും അവയെല്ലാം വിഎസിനെ പ്രത്യേക തലത്തില്‍ പ്രതിഷ്ഠിക്കാനാണ് ശ്രമിച്ചതെന്നും അതില്‍ നിന്നും വ്യത്യസ്തമായി വിഎസിന്റെ ജീവിതം അടയാളപ്പെടുത്തുന്നതാണ് 'ഒരു സമര നൂറ്റാണ്ട്' എന്നും പുസ്തകം രചിച്ച കെ വി സുധാകരന്‍ പറഞ്ഞു. സിപിഎം സംസ്ഥാന സെക്രട്ടറി എംവി ഗോവിന്ദനാണ് പുസ്തകത്തിന് അവതാരിക എഴുതിയത്. ചിന്ത പബ്ലിക്കേഷന്‍സാണ് പുസ്തകം പുറത്തിറക്കിയത്.