നടി ആക്രമിക്കപ്പെട്ട കേസില്‍ വിചാരണ കോടതി ജഡ്ജിയെ മാറ്റണമെന്ന് ആവശ്യപ്പെട്ട് അതിജീവിത ഹൈക്കോടതിയില്‍. വനിതാ ജഡ്ജിയുടെ കീഴിലെ വിചാരണയില്‍ അതൃപ്തി രേഖപ്പെടുത്തിക്കൊണ്ട് നടി കത്ത് നല്‍കി. തനിക്ക് നീതി ലഭിക്കുമെന്ന് കരുതുന്നില്ലെന്നാണ് ഹൈക്കോടതി രജിസ്ട്രാർക്ക് നൽകിയ കത്തിൽ നടി പറയുന്നത്.
മെമ്മറികാര്‍ഡിലെ ദൃശ്യങ്ങള്‍ കോടതിക്ക് പുറത്തുപോയിട്ടുണ്ടാകുമെന്ന് സംശയമുണ്ട്. ദൃശ്യങ്ങള്‍ പ്രചരിപ്പിക്കപ്പെടുമോയെന്ന് തനിക്ക് പേടിയുമുണ്ട്. ഇക്കാര്യം ശ്രദ്ധയില്‍പ്പെട്ടിട്ടും കുറ്റവാളികളെ കണ്ടെത്താന്‍ നടപടിയെടുക്കുന്നില്ലെന്നും നടി ആരോപിക്കുന്നു.
നേരത്തെയും വിചാരണക്കോടതി ജഡ്ജിക്കെതിരെ നടി രംഗത്ത് എത്തിയിരുന്നു. പക്ഷപാതപരമായി പെരുമാറുന്നുവെന്നായിരുന്നു ആരോപണം. ജഡ്ജി പുരുഷനായാലും കുഴപ്പില്ല, ഇപ്പോഴത്തെ ജഡ്ജിയെ മാറ്റണമെന്നാണ് ആവശ്യം.