അക്കാദമി ഓഫ് ഫാമിലി ഫിസിഷ്യൻസ് ഓഫ് ഇന്ത്യ (എ എഫ് പി ഐ)യുടെ, കേരള ഘടകത്തിന്റെ വാർഷിക സമ്മേളനവും ശില്പശാലയും, ജനുവരി 14, 15 തീയതികളിൽ, തിരുവനന്തപുരം ഹൈസിന്ത് ഹോട്ടലിൽ സംഘടിപ്പിക്കുന്നു. പ്രാഥമികാരോഗ്യ പരിപാലനത്തിന്റെ പ്രാധാന്യം ഉയർത്തി കാട്ടുന്ന കോവിഡ്‌ കാലഘട്ടത്തിൽ, ഫാമിലി മെഡിസിൻ വിഭാഗത്തിന്റെ ആവശ്യകതയും പ്രാഥമികാരോഗ്യ രംഗത്തുള്ള നൂതന ചികിത്സാരീതികളും ചർച്ച ചെയ്യപ്പെടുന്ന സമ്മേളനം ഡോ. ശശി തരൂർ എം പി ഉദ്‌ഘാടനം ചെയ്യും.
രാജ്യത്തെ വിവിധ ഭാഗങ്ങളില്‍ നിന്നുള്ള ഫാമിലി ഫിസിഷ്യൻസും പ്രാഥമികാരോഗ്യ രംഗത്ത് പ്രവർത്തിക്കുന്ന മറ്റു ഡോക്ടർമാരും ഫാമിലി മെഡിസിൻ ബിരുദാനന്തര ബിരുദ വിദ്യാർഥികളും ഒത്തുചേരുന്ന സമ്മേളനത്തിൽ പ്രമുഖ ഡോക്ടർമാരുടെ പ്രഭാഷണങ്ങളും പ്രായോഗിക പരിശീലനത്തിനുള്ള ശില്പശാലകളും ഉണ്ടാകും. തലസ്ഥാനത്ത് ഇതാദ്യമായാണ് അക്കാദമി ഓഫ് ഫാമിലി ഫിസിഷ്യൻസ് ഓഫ് ഇന്ത്യ കേരള ഘടകത്തിന്റെ വാർഷിക സമ്മേളനം നടക്കുന്നത്.