തിരുവനന്തപുരം പാച്ചല്ലൂർ സ്വദേശിയായ എ ആർ അജിത് കുമാർ ഒന്നരവർഷം മുൻപ് വിരമിച്ച പോലീസ് ഉദ്യോഗസ്ഥനാണ്. പക്ഷെ അദ്ദേഹം ഇപ്പോഴും 'സർവീസിൽ തുടരുന്നുണ്ട്'. മ്യൂസിയം ആക്രമണകേസ് ഉൾപ്പടെ അനവധി സുപ്രധാന കേസുകളിൽ പ്രതികളുടെ രേഖാചിത്രം വരച്ചയാളാണ് അദ്ദേഹം.

ഇരുപത് വര്‍ഷങ്ങള്‍ക്ക് മുന്‍പ് തിരുവനന്തപുരം ഫോർട്ട് സ്‌റ്റേഷനിലെ ക്രൈം സ്ക്വാഡിന്റെ ഭാഗമായതോടെയാണ് അജിത് കുമാറിന്റെ 'വര സർവീസ്' തുടങ്ങുന്നത്. കൊല്ലം ആനന്ദവല്ലീശ്വരം ക്ഷേത്ര കവർച്ച, അമ്പലമുക്ക് കൊലക്കേസ്, വെഞ്ഞാറമൂട് ആര്യ കൊലക്കേസ് എന്നിവയ്ക്ക് പുറമെ കേരളം ഏറെ ചര്‍ച്ച ചെയ്ത ബണ്ടിചോർ മോഷണക്കേസ് തുടങ്ങി നിരവധി കേസുകളിൽ അജിത് കുമാർ വരച്ച ചിത്രങ്ങൾ അന്വേഷണ സംഘത്തിന് ഉപകാരപ്പെട്ടിട്ടുണ്ട്.