സർക്കാർ ഗവർണർ പോര് തുടരുന്നതിനിടെ നിയമസഭ സമ്മേളനം ചേരാനൊരുങ്ങി സർക്കാർ. സർവകലാശാലകളിലെ ചാൻസലർ പദവിയില്‍ നിന്ന് ഗവർണറെ മാറ്റുന്നതിനുള്ള ബില്‍ സമ്മേളനത്തില്‍ അവസതരിപ്പിക്കും. നാളെ ചേരുന്ന മന്ത്രിസഭാ യോഗത്തില്‍ നിയമസഭാ സമ്മേളനം ചേരുന്ന തീയതിയുടെ കാര്യത്തില്‍ തീരുമാനമുണ്ടാകും.
സർവകലാശാലകളിലെ ചാൻസലർ പദവിയില്‍ നിന്ന് ഗവർണറെ മാറ്റാനുള്ള നടപടിയുമായി മുന്നോട്ട് പോകാൻ സർക്കാർ തീരുമാനിച്ചിരുന്നു. ഇതിനെത്തുടർന്നാണ് നിയമസഭാ സമ്മേളനം ചേർന്ന് ബില്ല് അവതരിപ്പിക്കാൻ തീരുമാനിച്ചിരിക്കുന്നത്. ഡിസംബർ 5 മുതല്‍ 15 വരെ സമ്മേളനം ചേരാനാണ് ആലോചിക്കുന്നത്.
നിയമസഭയില്‍ അവതരിപ്പിക്കുന്ന ബില്ലിനെ പ്രതിപക്ഷവും പിന്തുണയ്ക്കുമെന്നാണ് സർക്കാർ പ്രതീക്ഷിക്കുന്നത്. ബില്ല് പാസായാലും ഗവർണർ ഒപ്പിട്ടാല്‍ മാത്രമെ നിയമമാകുകയുള്ളു. ബില്ലില്‍ ഗവർണർ ഒപ്പിട്ടില്ലെങ്കില്‍ നിയമ നടപടിയുമായി സർക്കാർ മുന്നോട്ട് പോകും. ഇതിനായി സ്വീകരിക്കേണ്ടതിനെക്കുറിച്ച് നിയമോപദേശവും സർക്കാർ തേടിയിട്ടുണ്ട്.