തിരുവനന്തപുരം നഗരത്തില്‍ സ്ത്രീകള്‍ക്കെതിരായ അതിക്രമങ്ങള്‍ തുടര്‍ക്കഥയാകുന്നു. വെള്ളിയാഴ്ച രാത്രിയും നഗരത്തിലെ മ്യൂസിയത്തിന് സമീപം യുവതിക്ക് നേരെ അതിക്രമം ഉണ്ടായതായി പരാതി. രാത്രി 11.45 ഓടെയാണ് മ്യൂസിയം പരിസരത്തെ കനക നഗറില്‍ വച്ചാണ് യുവതിക്ക് നേരെ ആക്രമണമുണ്ടായത്. മാതൃഭൂമി കനകക്കുന്നില്‍ സംഘടിപ്പിക്കുന്ന സാഹിത്യ സമ്മേളനത്തില്‍ പങ്കെടുത്ത് താമസ സ്ഥലത്തേക്ക് മടങ്ങുമ്പോഴായിരുന്നു ആക്രമണം. ബൈക്കിലെത്തിയ രണ്ടംഗ സംഘത്തിന്റെ അതിക്രമത്തില്‍ യുവതിയ്ക്ക് പരുക്കേറ്റു.

ബൈക്കില്‍ പിന്തുടര്‍ന്നെത്തിയ രണ്ടംഗ സംഘമാണ് ആക്രമണം നടത്തിയതെന്ന് യുവതി നല്‍കിയ പരാതിയില്‍ പറയുന്നു. ബൈക്കിലെത്തിയ സംഘം തടഞ്ഞു നിര്‍ത്തി മാല തട്ടിപ്പറിക്കാന്‍ ശ്രമിച്ചു. ഇതിനിടയില്‍ യുവതിയുടെ കഴുത്തിനും മുഖത്തും പരിക്കുപറ്റി. സംഭവത്തില്‍ യുവതിക്ക് നേരെ ലൈഗീകാതിക്രമം നടത്തിയതിന് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

സംഭവത്തിന് പിന്നില്‍ മോഷണ ശ്രമമാണെന്ന നിഗമനത്തിലാണ് മ്യൂസിയം പോലീസ്. സ്ഥലത്തെ സിസിടിവി ദൃശ്യങ്ങള്‍ ഉള്‍പ്പെടെ പരിശോധിക്കുമെന്നും പ്രതികളെ ഉടന്‍ തിരിച്ചറിയാന്‍ സാധിക്കുമെന്നും പോലീസ് വ്യക്തമാക്കി. മ്യൂസിയം പരിസരത്ത് രാത്രികാലങ്ങളില്‍ സ്ത്രീകള്‍ക്ക് നേരെയുള്ള അതിക്രമങ്ങള്‍ തുടര്‍ക്കഥയാവുകയാണ്. നേരത്തെ ഒരു വനിതാ ഡോക്ടര്‍ക്ക് നേരെയും മ്യൂസിയം പരിസരത്ത് ആക്രമണം നടന്നിരുന്നു.