സർവകലാശാലകളുടെ ചാൻസലർ പദവിയില്‍ നിന്ന് ഗവർണറെ മാറ്റുന്നതിന് സംസ്ഥാന സർക്കാർ ബില്‍ കൊണ്ടുവരും. അടുത്ത മാസം അഞ്ച് മുതല്‍ നിയമസഭാ സമ്മേളനം ചേരാന്‍ മന്ത്രിസഭാ യോഗം തീരുമാനമെടുത്തു. ഈ സമ്മേളനത്തില്‍ ബില്‍ അവതരിപ്പിക്കാനാണ് തീരുമാനം. ബില്‍ അവതരിപ്പിക്കുന്നതോടെ സർക്കാർ തയ്യാറാക്കിയ ഓർഡിനൻസ് അസാധുവാകും.
ചാൻസലർ പദവിയില്‍ നിന്ന് ഗവർണറെ മാറ്റുന്നതിന് ഓർഡിനൻസ് പാസാക്കി അയച്ചിരുന്നു. എന്നാല്‍ ഗവർണർ ആരിഫ് മുഹമ്മദ് ഖാൻ ഓർഡിനന്‍സില്‍ ഒപ്പിട്ടിട്ടില്ല. ഓർഡിനൻസ് രാഷ്ട്രപതിക്ക് അയയ്ക്കുമെന്നാണ് ഗവർണർ വ്യക്തമാക്കിയിരിക്കുന്നത്. ഈ സാഹചര്യത്തിലാണ് ഓർഡിനൻസ് അസാധുവാക്കി പകരം ബില്‍ അവതരിപ്പിച്ച് നിയമമാക്കാൻ സര്‍ക്കാര്‍ ആലോചിക്കുന്നത്.