പത്തനംതിട്ട ആറന്മുളയില്‍ പമ്പയാറ്റില്‍ ഒഴുക്കില്‍പ്പെട്ട് രണ്ട് സഹോദരങ്ങള്‍ മുങ്ങിമരിച്ചു. മാരാമണ്‍ ഭാഗത്തുണ്ടായ അപകടത്തില്‍ ചെട്ടികുളങ്ങര കണ്ണമംഗലം സ്വദേശി മെറിന്‍ വില്ലയില്‍ മെറിന്‍ (18 ) സഹോദരന്‍ മെഫിന്‍ (15 ) എന്നിവരാണ് മരിച്ചത്. ഇരുവരുടെയും മൃതദേഹങ്ങള്‍ കണ്ടെത്തി. കാണാതായ തോണ്ടപ്പുറത്ത് സ്വദേശി എബിനായി തിരച്ചില്‍ തുടരുകയാണ്.
ഒരാള്‍ ആഴത്തിലേക്ക് വീഴുന്നതു കണ്ട് മറ്റു രണ്ടുപേര്‍ രക്ഷിക്കാനായി ഇറങ്ങുകയായിരുന്നു
മാരാമണ്‍ കണ്‍വെന്‍ഷനില്‍ പങ്കെടുക്കാന്‍ ബന്ധുക്കള്‍ക്കൊപ്പം എത്തിയതായിരുന്നു ഇവര്‍. കടവില്‍ കുളിക്കാനിറങ്ങിയപ്പോഴാണ് അപകടമുണ്ടായത്. ഇന്ന് വൈകിട്ട് മൂന്നരയോടെയായിരുന്നു സംഭവം. ഒരാള്‍ ആഴത്തിലേക്ക് വീഴുന്നതു കണ്ട് മറ്റു രണ്ടുപേര്‍ രക്ഷിക്കാനായി ഇറങ്ങുകയായിരുന്നു. അതിനിടെ മൂന്നുപേരും പരപ്പുഴ കടവിന് സമീപത്തെ കയത്തില്‍ മുങ്ങിത്താഴുകയായിരുന്നു. പത്തനംതിട്ടയില്‍ നിന്നുള്ള അഗ്നിരക്ഷാ സേനാഗംങ്ങളും സ്‌കൂബാ അംഗങ്ങളും നാട്ടുകാരും ചേര്‍ന്നാണ് തെരച്ചില്‍ നടത്തിയത്.
കണ്‍വെന്‍ഷനില്‍ പങ്കെടുത്തു മടങ്ങുന്നതിനിടെ കുളിക്കാന്‍ നദിയിലിറങ്ങിയപ്പോഴാണ് അപകടമുണ്ടായത്
എട്ടുപേര്‍ ഉള്‍പ്പെടുന്ന സംഘത്തിനൊപ്പമാണ് ഇവര്‍ മാരാമണ്‍ കണ്‍വെന്‍ഷന്‍ കാണാനെത്തിയത്. രാത്രിയായതോടെ മൂന്നാമത്തെയാള്‍ക്കായുള്ള തിരച്ചില്‍ നിര്‍ത്തിവച്ചിരിക്കുകയാണ്.