കോഴിക്കോട് കുന്ദമംഗലം ടൗണില്‍ വിരണ്ടോടിയ കാള പരിഭ്രാന്തി സൃഷ്ടിച്ചു. ജനത്തിരക്കേറിയ ടൗണില്‍ ഇന്നലെ രാത്രി ഏഴ് മണിയോടെയാണ് സംഭവം നടന്നത്.കാരന്തൂര്‍ ഭാഗത്ത് അറവിനായി കൊണ്ടു വന്ന കാളയാണ് രക്ഷപെട്ട് ടൗണിലേക്ക് ഓടിയെത്തിയത്. കാളയെക്കണ്ട് പേടിച്ചു ഓടുന്നതിനിടെ ഒരു സ്ത്രീക്കും കുഞ്ഞിനും പരുക്കേറ്റു.
ലക്ഷ്യമില്ലാതെ ഓടിയ കാള വാഹനങ്ങളെയും തട്ടി. ഇരുചക്രവാഹനങ്ങള്‍ക്കും കാറുകള്‍ക്കും കേടുപാടുകള്‍ സംഭവിച്ചു. വാഹനങ്ങള്‍ക്ക് കുറുകെ ഓടിയ കാള അരമണിക്കൂറോളം ടൗണില്‍ പരിഭ്രാന്തി പരത്തി.ഒടുവില്‍ സംഭവ സ്ഥലത്തെത്തിയ നാട്ടുകാരും പോലീസും ചേര്‍ന്നാണ് കാളയെ പിടിച്ചു കെട്ടിയത്.