കൊച്ചിയിൽ മോഡലിനെ കാറിൽ ബലാത്സംഗം ചെയ്ത കേസിൽ മുഖ്യ പ്രതികൾ മലയാളികളെന്ന് സിറ്റി പോലീസ് കമ്മീഷണർ സിഎച്ച് നാ​ഗരാജു. പ്രതികളിൽ രാജസ്ഥാൻ സ്വദേശി ഉൾപ്പെടെ നാല് പേരുടെയും അറസ്റ്റ് രേഖപ്പെടുത്തിയതായും സിറ്റി പോലീസ് കമ്മീഷണർ അറിയിച്ചു. പ്രതികൾ ലഹരി മരുന്ന് ഉപയോ​ഗിച്ചിരുന്നോ എന്ന് ശാസ്ത്രീയ പരിശോധന നടത്തുമെന്നും അദ്ദേഹം മാധ്യമങ്ങളോട് പറഞ്ഞു.

ബലാത്സംഗ കേസുകളില്‍ ലഹരി സാന്നിധ്യം കൂടുതലായി കാണുന്ന സാഹചര്യമുണ്ട്. പെണ്‍കുട്ടിയ്ക്ക് ലഹരിമരുന്ന് കൊടുത്തോ എന്ന് ശാസ്ത്രീയ പരിശോധന നടത്തുന്നുണ്ട്. ഇരയുടെ സുഹൃത്ത് പീഡനത്തിന് ഒത്താശ ചെയ്ത സാഹചര്യമുണ്ടെന്നും സിറ്റി പോലീസ് കമ്മീഷണര്‍ ചൂണ്ടിക്കാട്ടി.

പ്രതികൾ കൃത്യം നടത്താൻ ഉപയോ​ഗിച്ച കാറും പോലീസ് കണ്ടുകെട്ടിയിട്ടുണ്ട്. ആശുപത്രി അധികൃതർക്ക് ഉണ്ടായ സംശയത്തെ തുടർന്നാണ് പോലീസ് സംഭവം അറിയുന്നതെന്നും പീഡനത്തിന് ഇരയായ പെൺകുട്ടി പരാതി നൽകിയിരുന്നില്ലെന്നും അദ്ദേഹം പറഞ്ഞു. അതേസമയം കൃത്യം നടത്താൻ പ്രതികൾ നേരത്തെ തീരുമാനിച്ചിരുന്നോ അല്ല അപ്പോൾ തീരുമാനിച്ചതാണോ എന്നടക്കമുളള കാര്യങ്ങൾ അന്വേഷിച്ച് വരികയാണെന്നും കൂടുതൽ കാര്യങ്ങൾ കണ്ടെത്തേണ്ടതുണ്ടെന്നും അദ്ദേഹം കൂട്ടിച്ചേർത്തു.

അതേസമയം, കൊച്ചി കൂട്ടബലാത്സംക്കേസില്‍ അന്വേഷണം ശരിയായ ദിശയിലല്ലെന്ന് പരാതിക്കാരി. പോലീസ് ഫോണ്‍ പിടിച്ചു വച്ചിരിക്കുകയാണെന്നും അന്വേഷണത്തില്‍ തൃപ്തിയില്ലെന്നും പത്തൊന്‍പതു വയസ്സുകാരി മാധ്യമങ്ങളോട് വ്യക്തമാക്കി. ഡോളി എന്ന തന്റെ സുഹൃത്തിന്റെ നിര്‍ബന്ധപ്രകാരമാണ് ബാറില്‍ പോയതെന്നും കൂടെയുണ്ടായിരുന്ന മൂന്ന് യുവാക്കളെ തനിക്ക് പരിചയമില്ലായിരുന്നുവെന്നും യുവതി ചൂണ്ടിക്കാട്ടി. ബാറില്‍ വെച്ച് സുഹൃത്തുക്കള്‍ നല്‍കിയ മദ്യം കുടിച്ച താന്‍ കുഴഞ്ഞു വീണു. പിന്നീട് മൂന്ന് യുവാക്കളും ചേര്‍ന്ന് തന്നെ വണ്ടിയില്‍ കയറ്റിക്കൊണ്ടുപോവുകയായിരുന്നുവെന്നും ഡോളി വണ്ടിയില്‍ കയറിയില്ലെന്നും പരാതിക്കാരി വ്യക്തമാക്കി.

കഴിച്ചിരുന്ന ബിയറിൽ എന്തോ പൊടി കലർത്തിയതായി സംശയിക്കുന്നുവെന്നും പീഡനത്തിനിരയായ പെൺകുട്ടി പറഞ്ഞു. താൻ അവശയായ ശേഷം ഓടുന്ന കാറിൽ വച്ച് മൂന്നു പേരും തന്നെ പീഡിപ്പിച്ചു എന്നാണ് യുവതിയുടെ മൊഴി. എന്നാൽ, പേടിച്ചാണ് പുറത്ത് ആദ്യം പറയാതെയിരുന്നതെന്നും പ്രതികളെ കണ്ടാൽ തിരിച്ചറിയാൻ കഴിയുമെന്നും യുവതി പറയുന്നു.

വ്യാഴാഴ്ച രാത്രിയാണ് നാടിനെ ഞെട്ടിച്ച സംഭവം നടന്നത്. കൊച്ചിയിലെ ബാറിലെത്തിയ യുവതി കുഴഞ്ഞുവീണതോടെ ഒപ്പമുണ്ടായിരുന്ന യുവാക്കൾ ഇവരെ കാറിൽ കയറ്റിക്കൊണ്ടുപോയി. യാത്രാമധ്യേ മൂവരും യുവതിയെ ബലാത്സംഗം ചെയ്തെന്നാണ് പരാതി.