പുതുപ്പള്ളി ഉപതിരഞ്ഞെടുപ്പിൽ എൽഡിഎഫ് പ്രചാരണത്തിൽ സജീവമാകാൻ ഒരുങ്ങി മുഖ്യമന്ത്രി പിണറായി വിജയൻ. രണ്ടു ഘട്ടങ്ങളിലായിട്ടായിരിക്കും മുഖ്യമന്ത്രി മണ്ഡലത്തിൽ പ്രചാരണത്തിനെത്തുക. 16ന് നടക്കുന്ന എൽഡിഎഫ് കൺവെൻഷനിൽ മുഖ്യമന്ത്രി പങ്കെടുത്തേക്കും. മുഖ്യമന്ത്രിക്ക് പുറമെ മുതിർന്ന എൽഡിഎഫ് നേതാക്കളെയും മന്ത്രിമാരെയും മണ്ഡലത്തിൽ സജീവമായി അണിനിരത്താനാണ് എൽഡിഎഫ് തീരുമാനം.
എൽഡിഎഫ് സ്വാധീന മേഖലകളിൽ ഉൾപ്പെടെ ഗൃഹ സന്ദർശനവും പൊതുയോഗങ്ങളുംനടത്തി വോട്ട് ശതമാനം വർധിപ്പിക്കാമെന്നാണ് എൽഡിഎഫ് കണക്കുകൂട്ടൽ.
പുതുപ്പള്ളി ഉപതിരഞ്ഞെടുപ്പില്‍ ജെയ്ക് സി തോമസിനെ എല്‍ഡിഎഫ് സ്ഥാനാർഥിയാക്കാൻ ഇന്ന് ചേർന്ന എൽഡിഎഫ് സംസ്ഥാന സെക്രട്ടറിയേറ്റിൽ ധാരണയായിരുന്നു. ഔദ്യോഗിക പ്രഖ്യാപനം നാളെ കോട്ടയത്തുണ്ടാകും. പതിനേഴിന് ജെയ്ക് നാമനിർദ്ദേശ പത്രിക സമർപ്പിച്ചേക്കും എന്നാണ് വിവരം.
കഴിഞ്ഞ രണ്ട് നിയമസഭാ തിരഞ്ഞെടുപ്പുകളിലും ഉമ്മൻ ചാണ്ടിക്കെതിരെ മത്സരിച്ച ജെയ്ക് മൂന്നാം തവണയാണ് എൽഡിഎഫിന് വേണ്ടി അംഗത്തിനിറങ്ങുന്നത്.
ജെയ്ക്കിന്റേതടക്കം നാല് പേരുകളാണ് സജീവ പരിഗണനയിലുണ്ടായിരുന്നത്. കെ എം രാധാകൃഷ്ണൻ, റെജി സക്കറിയ, ഏരിയാ സെക്രട്ടറി സുഭാഷ് പി വർഗീസ് എന്നിവരുടെ പേരും പാർട്ടി പരിഗണിച്ചിരുന്നു.
സമുദായിക സമവാക്യവും ഒപ്പം മണ്ഡലത്തിലെ വോട്ടർമാർക്കിടയിലെ മുഖ പരിചയവും ജെയ്കിന് അനുകൂലമായി. 2016ല്‍ ഉമ്മന്‍ ചാണ്ടിയോട് 27,092 വോട്ടിന് തോറ്റ ജെയ്ക്, 2021ല്‍ ഭൂരിപക്ഷം 9044ലെത്തിച്ചിരുന്നു.