അഭിഭാഷകനായ മാത്യു എ കുഴൽനാടൻ എംഎൽഎയ്ക്കെതിരെ ബാർ കൗണ്‍സിലിൽ പരാതി. അഭിഭാഷകനായിരിക്കെ റിസോർട്ട് നടത്തുന്നത് അഭിഭാഷക നിയമത്തിനും ബാർ കൗൺസസിൽ ഒഫ് ഇന്ത്യയുടെ ചട്ടത്തിന് വിരുദ്ധമാണെന്നും ഇക്കാര്യം പരിശോധിച്ച് നടപടിയെടുക്കണമെന്നുമാവശ്യപ്പെട്ട് ആൾ ഇന്ത്യ ലായേഴ്‌സ് യൂണിയൻ എറണാകുളം കോടതി യൂണിറ്റ് സെക്രട്ടറി അഡ്വ. സി കെ സജീവൻ കേരള ബാർ കൗൺസിലിൽ പരാതി നൽകിയത്.
ചിന്നക്കനാൽ പഞ്ചായത്തിൽ കപ്പിത്താൻസ് ബംഗ്ലാവ് എന്ന പേരിൽ റിസോർട്ട് നടത്തുന്നത് മാത്യു എ കുഴൽനാടനാണ്. റിസോർട്ടിന് പഞ്ചായത്തിൽ നിന്ന് ലൈസൻസ് നൽകിയത് മാത്യു എ കുഴൽനാടൻ, ടോം സാബു, ടോണി സാബു എിന്നവരുടെ പേരിലാണെന്നും പരാതിയിൽ ആരോപിക്കുന്നു. ബാർ കൗൺസിൽ ഒഫ് ഇന്ത്യയുടെ ചട്ട പ്രകാരം അഭിഭാഷകർ ഇത്തരത്തിൽ ബിസിനസ് ചെയ്യാൻ പാടില്ല. അതിനാൽ മാത്യു കുഴൽനാടനെതിരെ അഭിഭാഷക നിയമപ്രകാരം നടപടി എടുക്കണമെന്നാണാവശ്യം. ചിന്നക്കനാൽ പഞ്ചായത്ത് റിസോർട്ടിനായി നൽകിയ ലൈസൻസിന്റെ പകർപ്പുൾപ്പെടെയാണ് അഡ്വ. സജീവൻ പരാതി നൽകിയിട്ടുള്ളത്. പരാതിയിൽ ബാർ കൗൺസിൽ മാത്യു എ കുഴൽനാടനിൽ നിന്ന് വിശദീകരണം തേടി ഉചിതമായ നടപടി എടുക്കണമെന്നാണ് ആവശ്യം.
ചിന്നക്കനാൽ പഞ്ചായത്ത് റിസോർട്ടിനായി നൽകിയ ലൈസൻസിന്റെ പകർപ്പുൾപ്പെടെയാണ് പരാതി
മാത്യു കുഴൽനാടനെതിരെ പരാതി ലഭിച്ചിട്ടുണ്ടെന്നും നടപടി ക്രമങ്ങളുടെ ഭാഗമായി വിശദീകരണം തേടുമെന്നും ബാർ കൗൺസിൽ ചെയർമാൻ കെ എൻ അനിൽകുമാർ ദ ഫോർത്തിനോട് പറഞ്ഞു.