എൻഡോസൾഫാൻ ദുരിത ബാധിതർക്കു നൽകിയ വീടുകളുടെ ജീർണാവസ്ഥ പരിശോധിച്ചു റിപ്പോർട്ടു നൽകണമെന്ന ഉത്തരവു പാലിക്കാതിരുന്ന കാസർകോട് ജില്ലാ കളക്ടറെയാണ് ഹൈക്കോടതി രൂക്ഷമായി വിമർശിച്ചു. ഹർജി സെപ്തംബർ 25 നു വീണ്ടും പരിഗണിക്കുമ്പോൾ ജില്ലാ കളക്ടർ ഓൺലൈൻ മുഖേന ഹാജരായി വിശദീകരണം നൽകാനും കോടതി ഉത്തരവിട്ടു.

ജില്ലാ കളക്ടർ വിഷയത്തിന്റെ ഗൗരവത്തെക്കുറിച്ച് ബോധവാനാകണമായിരുന്നു. കളക്ടർ ഇവരുടെ കാര്യത്തിൽ നൂറുശതമാനം മുൻഗണന നൽകണമായിരുന്നു. അവരുടെ ദുരിതം നേരിട്ടു കണ്ടാലേ മനസിലാകൂ. ദന്തഗോപുരങ്ങളിലിരുന്നാണ് നാം സംസാരിക്കുന്നത്. അതിൽ കാര്യമില്ല. ദുരിതബാധിതരിൽ പലരും വാടക വീടുകളിലാണ് കഴിയുന്നത്. മനസാക്ഷി മരവിച്ചു പ്രതികരണശേഷി നഷ്ടപ്പെട്ട നിലയിലായിക്കഴിഞ്ഞോ നാം ? ദുരിതബാധിതരുടെ പ്രശ്നങ്ങൾ എന്തുകൊണ്ടാണ് കളക്ടർക്ക് മനസിലാവാത്തതെന്നും കോടതി വാക്കാൽ ചോദിച്ചു.

വീടുകൾ യഥാസമയം കൈമാറാത്തതിനാൽ ജീർണാവസ്ഥയിലാണെന്നു ചൂണ്ടിക്കാട്ടി സത്യസായി ഓർഫനേജ് ട്രസ്റ്റ് നൽകിയ ഹർജിയിൽ ജസ്റ്റിസ് ദേവൻ രാമചന്ദ്രനാണ് കളക്ടർക്കെതിരെ വിമർശനമുന്നയിച്ചത്. 81 വീടുകൾ ഹർജിക്കാർ നിർമിച്ചതിൽ പലതും കൈമാറാത്തതിനാൽ ജീർണാവസ്ഥയിലാണെെന്നും പുനഃർനിർമ്മിക്കാൻ 24 ലക്ഷം രൂപ വേണമെന്നും ഹർജിക്കാർ വ്യക്തമാക്കിയിരുന്നു. തുടർന്ന് ജില്ലാ കളക്ടർ സ്ഥലം സന്ദർശിച്ചു റിപ്പോർട്ടു നൽകാനും ഉത്തരവിട്ടിരുന്നു. എന്നാൽ ജില്ലാ കളക്ടറിൽ നിന്ന് വിശദീകരണം ലഭിച്ചിട്ടില്ലെന്ന് സർക്കാർ അഭിഭാഷകൻ അറിയിച്ചു. തുടർന്നാണ് ഹൈക്കോടതി കളക്ടറുടെ നടപടിയെ രൂക്ഷമായി വിമർശിച്ചത്.