ബ്രഹ്മപുരം മാലിന്യ പ്ലാന്റിൽ നിന്നും വിഷപ്പുക പുറത്തു വരുന്ന സാഹചര്യത്തിൽ എറണാകുളത്തെ വിദ്യാഭ്യാസ സ്ഥാപനങ്ങളിലെ അവധി ബുധനാഴ്ച വരെ നീട്ടി. പ്രൊഫഷണൽ കോളേജുകൾക്കും അങ്കണവാടികൾ, കിന്റർഗാർട്ടൺ, ഡേ കെയർ സെന്ററുകൾ എന്നിവയ്ക്കും സർക്കാർ, എയ്ഡഡ്, അൺ എയ്ഡഡ്, സിബിഎസ്ഇ, ഐസിഎസ്ഇ, സ്‌കൂളുകൾക്കും അവധി ബാധകമായിരിക്കുമെന്ന് ജില്ലാ കളക്ടർ എൻ സ് കെ ഉമേഷ് അറിയിച്ചു. എന്നാൽ ഈ ദിവസങ്ങളിൽ നടത്താനിരുന്ന പരീക്ഷകളിൽ മാറ്റമുണ്ടാകില്ല.
വടവുകോട് -പുത്തൻകുരിശ് ഗ്രാമപഞ്ചായത്ത്, കിഴക്കമ്പലം ഗ്രാമപഞ്ചായത്ത്, കുന്നത്തുനാട് ഗ്രാമപഞ്ചായത്ത്, തൃക്കാക്കര മുനിസിപ്പാലിറ്റി, തൃപ്പൂണിത്തുറ മുനിസിപ്പാലിറ്റി, മരട് മുനിസിപ്പാലിറ്റി, കളമശ്ശേരി മുനിസിപ്പാലിറ്റി, കൊച്ചി മുനിസിപ്പൽ കോർപ്പറേഷൻ എന്നീ തദ്ദേശ സ്ഥാപനങ്ങളിലെ വിദ്യാഭ്യാസ സ്ഥാപനങ്ങൾക്കാണ് അവധി നീട്ടി നൽകിയത്.
അതേസമയം തിങ്കള്‍, ചൊവ്വ, ബുധന്‍ ദിവസങ്ങളില്‍ നടത്താനിരിക്കുന്ന എസ്എസ്എൽസി, വിഎച്ച്എസ്ഇ, ഹയർ സെക്കന്ററി പ്ലസ് വൺ, പ്ലസ് ടു പൊതു പരീക്ഷകൾക്കും സർവകലാശാല പരീക്ഷകൾക്കും മാറ്റമില്ലെന്ന് കളക്ടർ അറിയിച്ചു.
ജില്ലയുടെ വിവിധ പ്രദേശങ്ങളിൽ അനുഭവപ്പെടുന്ന പുകയുടെ തോതിൽ ഗണ്യമായ കുറവ് വന്നിട്ടുണ്ടെന്ന് കളക്ടർ പ്രസ്താവനയിലൂടെ വ്യക്തമാക്കി. കഴിഞ്ഞ ദിവസങ്ങളെ അപേക്ഷിച്ച് വായു ഗുണനിലവാര സൂചികയിൽ വലിയ തോതിൽ മെച്ചപ്പെട്ടിട്ടുണ്ട്. എങ്കിലും ആരോഗ്യപരമായ മുൻകരുതലിന്റെ ഭാഗമായാണ് അവധി പ്രഖ്യാപിച്ചതെന്ന് കളക്ടർ വ്യക്തമാക്കി.