വ്യാജ കരാർ ചമച്ച് ഭീഷണിപ്പെടുത്തി അശ്ലീല വെബ് സീരിസിൽ യുവതിയെ അഭിനയിപ്പിച്ചെന്ന കേസിലെ പ്രതികൾക്ക് ഹൈക്കോടതി മുൻകൂർ ജാമ്യം അനുവദിച്ചു. ഭീഷണിപ്പെടുത്തി അശ്ലീല വെബ് സീരിസിൽ അഭിനയിപ്പിച്ചെന്നും, ആ ദൃശ്യങ്ങള്‍ ഒടിടി പ്ലാറ്റ്ഫോമിലൂടെ സംപ്രേഷണം ചെയ്തുവെന്നുമാണ് കേസ്. സംഭവത്തില്‍ ഒടിടി പ്ലാറ്റ് ഫോമിന്റെ ചുമതലക്കാരായ കോട്ടയം വൈക്കം സ്വദേശിനി ശ്രീല പി മണിയെന്ന ലക്ഷ്‌മി ദീപ്‌ത, പാറശാല സ്വദേശി അബിസൺ എന്നിവർക്കാണ് ജസ്റ്റിസ് ബെച്ചുകുര്യൻ മുൻകൂർ ജാമ്യം അനുവദിച്ചത്. അശ്ലീല വെബ് സീരിസിൽ അഭിനയിപ്പിച്ചെന്ന കൊല്ലം സ്വദേശിനിയുടെ പരാതിയിലാണ് ഇരുവർക്കുമെതിരെ കോവളം പോലീസ് കേസെടുത്തത്.
ജൂൺ അഞ്ച്, ഏഴ് തീയതികളിലായി ഷൂട്ട് ചെയ്ത വെബ് സീരീസ് ഓഗസ്റ്റ് 24, 31 തീയതികളിലായാണ് സംപ്രേഷണം ചെയ്തത്. എന്നാൽ, ഒക്ടോബർ 22നാണ് പരാതിയിൽ പോലീസ് കേസെടുത്തതെന്ന് പ്രതികൾ ചൂണ്ടിക്കാട്ടി. കുറ്റം ചെയ്തിട്ടില്ലെന്നും തെറ്റിദ്ധരിപ്പിക്കുന്നതാണ് പരാതിയെന്നുമാണ് ഹര്‍ജിക്കാരുടെ വാദം. തുടർന്നാണ് ഇരുവർക്കും ഉപാധികളോടെ മുൻകൂർ ജാമ്യം അനുവദിച്ചത്.
ജനുവരി മൂന്ന്, നാല് തീയതികളിൽ അന്വേഷണ ഉദ്യോഗസ്ഥൻ മുൻപാകെ ചോദ്യംചെയ്യലിന് പ്രതികൾ ഹാജരാകണമെന്നും അറസ്റ്റുണ്ടായാൽ കോടതിയിൽ ഹാജരാക്കി 50,000 രൂപയുടെ ബോണ്ടും തുല്യ തുകക്കുള്ള രണ്ട് ആൾജാമ്യവും എന്ന ഉപാധിയോടെ വിട്ടയക്കണമെന്നുമാണ് ഉത്തരവ്. അന്വേഷണ ഉദ്യോഗസ്ഥൻ ആവശ്യപ്പെടുമ്പോൾ ഹാജരാകണം, സാക്ഷികളെ സ്വാധീനിക്കാനോ തെളിവു നശിപ്പിക്കാനോ ശ്രമിക്കരുതെന്നും കോടതി വ്യക്തമാക്കി.