കൊച്ചിയില്‍ മൂന്ന് വയസുകാരന്‍ കാലുതെറ്റി കാനയില്‍ വീണ സംഭവത്തില്‍ ഹൈക്കോടതിയില്‍ ഖേദം രേഖപ്പെടുത്തി കോര്‍പറേഷന്‍ സെക്രട്ടറി. കൊച്ചി കോര്‍പറേഷന്‍ സെക്രട്ടറി ബാബു അബ്ദുള്‍ ഖാദര്‍ ആണ് ജസ്റ്റിസ് ദേവന്‍ രാമചന്ദ്രന് മുമ്പാകെ ഹാജരായത്. കുട്ടിയ്ക്ക് അപകടം പറ്റിയ സംഭവം ഭീകരമായ ദുരവസ്ഥയാണെന്നും ന്യായീകരിക്കാന്‍ പറ്റില്ലെന്നും ഹൈക്കോടതി കുറ്റപ്പെടുത്തി.
സൈക്കിള്‍ ഓടിക്കാന്‍ പോലും പറ്റാത്ത റോഡാണ് പലയിടത്തും. കുട്ടികള്‍ക്ക് നടക്കാന്‍ പറ്റില്ലെന്നും കോടതി. ഭാഗ്യത്തിനാണ് കുട്ടി രക്ഷപ്പെട്ടത്. കോര്‍പറേഷനാണ് ഇക്കാര്യത്തില്‍ ഉത്തരവാദിത്തമെന്നും അന്താരാഷ്ട്ര നിലവാരത്തില്‍ പ്രവൃത്തി ചെയ്യണമെന്നും കോടതി നിര്‍ദേശിച്ചു.
രണ്ടാഴ്ചയ്ക്കകം ഓവുചാലുകള്‍ മൂടുന്നതിന് നടപടി സ്വീകരിക്കുമന്ന് കോര്‍പറേഷന്‍ സെക്രട്ടറി കോടതിയില്‍ വ്യക്തമാക്കി. അപകടം സംഭവിച്ചതില്‍ ഖേദം രേഖപ്പെടുത്തിയ കോര്‍പറേഷന്‍ സെക്രട്ടറിയെ അഭിനന്ദിക്കുന്നുവെന്നും ഹൈക്കോടതി പ്രതികരിച്ചു. പിന്നാലെ കേസ് പരിഗണിക്കുന്നത് ഡിസംബർ 2 ലേക്ക് മാറ്റി.
ഇന്നലെ രാത്രി എട്ടരയോടെയാണ് കടവന്ത്രയില്‍ നിന്ന് പനമ്പിള്ളി നഗറിലുള്ള വീട്ടിലേക്ക് മടങ്ങവേ മൂന്ന് വയസ്സുകാരൻ കാനയിലേക്ക് വീണത്. റോഡരികിലൂടെ നടന്നു പോവുകയായിരുന്ന കുട്ടി കാല് തെറ്റി വീഴുകയായിരുന്നു. നാട്ടുകാർ ചേർന്ന് പുറത്തെടുത്ത കുട്ടിയെ ഉടനെ തന്നെ ആശുപത്രിയിൽ പ്രവേശിപ്പിക്കുകയായിരുന്നു. കുട്ടിയുടെ ആരോഗ്യനില തൃപ്തികരണമാണെന്ന് ആശുപത്രി അധികൃതർ അറിയിച്ചു.