കൊച്ചിയില്‍ ചേർന്ന കെപിസിസി രാഷ്ട്രീയകാര്യ സമിതി യോഗത്തിലാണ് കെപിസിസി അധ്യക്ഷന്‍ കെ സുധാകരനെയും പ്രതിപക്ഷ നേതാവ് വിഡി സതീശനെയും വിമര്‍ശിച്ച് നേതാക്കള്‍ രംഗത്തെത്തിയത്. ആര്‍എസ്എസ് അനുകൂല പരാമര്‍ശത്തിലായിരുന്നു കെ സുധാകരനെതിരായ വിമര്‍ശനം. ഗവര്‍ണറെ നീക്കാനുള്ള സര്‍ക്കാര്‍ നടപടിയെ പിന്തുണച്ചത് തെറ്റിദ്ധാരണയുണ്ടാക്കിയെന്നും പ്രതിപക്ഷ നേതാവിന്റെ നിലപാടില്‍ വ്യക്തതയില്ല എന്നും വിഡി സതീശനെതിരെ നേതാക്കള്‍ വിമര്‍ശനമുന്നയിച്ചു.
ഘടക കക്ഷികളുടെ നിലപാട് കൂടി കണക്കിലെടുത്തുവെന്നും പൊതു നിലപാടെടുത്തത് അവരുടെ മറുപടി കൂടി കണക്കിലെടുത്താണെന്നുമായിരുന്നു വിഡി സതീശന്റെ മറുപടി
കോണ്‍ഗ്രസില്‍ ആഭ്യന്തര പ്രശ്‌നങ്ങള്‍ പുകയുമ്പോഴാണ് കെപിസിസി രാഷ്ട്രീയകാര്യ സമിതി ചേര്‍ന്നത്. തരൂര്‍ വിഷയവും ലീഗിനെ പ്രശംസിച്ച സിപിഎമ്മിന്റെ നിലപാടുമെല്ലാം യോഗത്തില്‍ ചര്‍ച്ചയായി. ഇതിനിടയിലാണ് പ്രതിപക്ഷ നേതാവും കെപിസിസി അധ്യക്ഷനും നേതാക്കളുടെ വിമര്‍ശനത്തിന് പാത്രമായത്. ചാന്‍സലര്‍ സ്ഥാനത്തുനിന്ന് ഗവര്‍ണറെ നീക്കാനുള്ള സര്‍ക്കാര്‍ തീരുമാനത്തില്‍ കോണ്‍ഗ്രസ് സ്വീകരിച്ച നിലപാടാണ് വിഡി സതീശനെതിരായ വിമര്‍ശനങ്ങള്‍ക്ക് കാരണം. എന്നാല്‍ വിഷയത്തില്‍ ഘടക കക്ഷികളുടെ നിലപാട് കൂടി കണക്കിലെടുത്തുവെന്നും പൊതു നിലപാടെടുത്തത് അവരുടെ മറുപടി കൂടി കണക്കിലെടുത്താണെന്നുമായിരുന്നു വിഡി സതീശന്റെ മറുപടി.
കെ സുധാകരന്റെ തുടര്‍ച്ചയായ ആര്‍എസ്എസ് അനുകൂല പ്രസ്താവനകളില്‍ മുസ്ലിം ലീഗ് ഉള്‍പ്പെടെ നേതൃത്വത്തെ എതിര്‍പ്പറിയിച്ചിരുന്നു. ഇതിന് പിന്നാലെയാണ് രാഷ്ട്രീയകാര്യ സമിതി യോഗത്തില്‍ ഒരു വിഭാഗം നേതാക്കളുടെ വിമര്‍ശനം. ശശി തരൂര്‍ വിഷയത്തില്‍, തരൂരിനെ കൂടി ഉള്‍ക്കൊണ്ട് പ്രശ്‌നം പരിഹരിക്കണമായിരുന്നുവെന്ന് എ ഗ്രൂപ്പ് വിമര്‍ശിച്ചു. തരൂരിന്റെ ജനപ്രീതി ഉപയോഗപ്പെടുത്തണമെന്നും യോഗം വിലയിരുത്തി. പുസ്തക പ്രകാശനത്തില്‍ മുഖ്യമന്ത്രിയെ ക്ഷണിച്ചതില്‍ പി ജെ കുര്യനും രാഷ്ട്രീയകാര്യ സമിതിയില്‍ വിമര്‍ശനമേല്‍ക്കേണ്ടി വന്നു.
സിപിഎമ്മിന്റെ മുസ്ലിം ലീഗ് പ്രശംസയില്‍ ലീഗ് നേതൃത്വം പക്വമായ പ്രതികരണം നടത്തിയെന്നാണ് യോഗത്തിലെ വിലയിരുത്തല്‍. സാദിഖലി തങ്ങള്‍ തന്നെ ഇക്കാര്യത്തില്‍ വിശദീകരണവുമായി രംഗത്തെത്തിയെന്നും ലീഗിനെ ഒപ്പം ചേര്‍ത്ത് തന്നെ മുന്നോട്ട് പോകണമെന്നും യോഗത്തില്‍ ആവശ്യമുയര്‍ന്നു.