തനിക്കെതിരായ വ്യാജരേഖ കേസ് കെട്ടിച്ചമച്ചതാണെന്ന മുൻ നിലപാടിലുറച്ച് കെ വിദ്യ. കേസ് നിയമപരമായി നേരിടാനാണ് തീരുമാനം. അതിനായി ഏതറ്റം വരെയും പോകുമെന്നും വിദ്യ മാധ്യമങ്ങളോട് പറഞ്ഞു. കോടതിയില്‍ ഹാജരാക്കാന്‍ കൊണ്ടു പോകുന്നതിനിടെയാണ് വിദ്യയുടെ പ്രതികരണം.
'നിങ്ങള്‍ ആവശ്യത്തിലധികം ആഘോഷിച്ചു'വെന്നായിരുന്നു മാധ്യമങ്ങളോട് വിദ്യയുടെ പ്രതികരണം. വൈദ്യ പരിശോധനയ്ക്ക് ശേഷമാണ് വിദ്യയെ മണ്ണാര്‍ക്കാട് കോടതിയിലേക്ക് കൊണ്ടുപോകുന്നത്. തനിക്കെതിരായ ആരോപണങ്ങള്‍ക്ക് പിന്നില്‍ രാഷ്ട്രീയ ഗൂഢാലോചന ഉണ്ടെന്നും വ്യാജ രേഖ ഹാജരാക്കിയിട്ടില്ലെന്നുമായിരുന്നു വിദ്യ അന്വേഷണ ഉദ്യോഗസ്ഥരോടും പറഞ്ഞത്. ഇതേ കാര്യം മാധ്യമങ്ങളോടും വിദ്യ ആവര്‍ത്തിച്ചു.
കേസ് രജിസ്റ്റര്‍ ചെയ്ത് 15 -ാം ദിവസമാണ് വിദ്യ പോലീസ് പിടിയിലായത്. കഴിഞ്ഞ ദിവസം രാത്രി കോഴിക്കോട് മേപ്പയൂരിലെ സുഹൃത്തിന്റെ വീട്ടില്‍ വെച്ചായിരുന്നു അഗളി പോലീസ് വിദ്യയെ പിടികൂടിയത്. കോഴിക്കോട് ജില്ലയിലെ പയ്യോളി, വടകര, തുടങ്ങിയ സ്ഥലങ്ങളില്‍ തിരച്ചില്‍ നടത്തുന്നതിനിടെയാണ് കസ്റ്റഡിയിലായത്.