പാലക്കാട് മണ്ണാർക്കാട് കോഴിക്കൂട്ടിൽ കുടുങ്ങിയ പുലി ചത്തതായി സ്ഥിരീകരിച്ച് വനം വകുപ്പ്. കോട്ടോപ്പാടം പൂവത്താണി ഫിലിപ്പ് എന്നയാളുടെ പറമ്പിലെ കോഴിക്കൂട്ടിനകത്ത് കുടുങ്ങിയ പുലിയാണ് ചത്തത്. ഇരുമ്പ് വലയില്‍ കൈകള്‍ കുടുങ്ങി ആറ് മണിക്കൂറിലേറെ സമയമാണ് പുലി കിടന്നത്.
പുലർച്ചെ ഒരുമണിയോടെയാണ് പുലി കോഴിക്കൂട്ടിൽ കുടുങ്ങിയത്. കോഴികളുടെ ബഹളം കേട്ട് പുറത്തിറങ്ങിയ ഫിലിപ്പ് കൂട്ടിൽ കുടുങ്ങിയ പുലിയെ കണ്ട് ഓടി രക്ഷപ്പെട്ടു. എന്നാൽ പുറത്തിറങ്ങാൻ കഴിയാത്ത വിധത്തിൽ കോഴിക്കൂടിന്റെ ഇരുമ്പ് വലയിൽ പുലിയുടെ കൈകള്‍ കുടുങ്ങുകയായിരുന്നു.
മണ്ണാർക്കാട് റേഞ്ച് ഓഫീസർ സുബൈറിന്റെ നേതൃത്വത്തിൽ വനപാലകരും പോലീസും സ്ഥലത്തെത്തിയിരുന്നു. എന്നാല്‍ അക്രമ സാധ്യത കണക്കിലെടുത്ത് മയക്കുവെടിവെച്ചതിന് ശേഷം പുലിയ കൂട്ടിനകത്തേക്ക് മാറ്റാനായിരുന്നു തീരുമാനം. ഇതിനായി വയനാട്ടിൽ നിന്നും ചീഫ് ഫോറസ്റ്റ് വെറ്റിനറി സർജൻ അരുൺ സക്കറിയയുടെ നേതൃത്വത്തിലുള്ള സംഘം മണ്ണാര്‍ക്കാട്ടേയ്ക്ക് തിരിച്ചിരുന്നു.