മാത്യു കുഴൽനാടൻ എംഎൽഎയുടെ ചിന്നക്കനാലിലെ റിസോർട്ടിന് ലൈസൻസ് പുതുക്കി നൽകി. റിസോർട്ടിന്റെ ഹോം സ്റ്റേ ലൈസൻസാണ് പുതുക്കി നൽകിയിരിക്കുന്നത്. ഈ വർഷം ഡിസംബർ 31 വരെയാണ് ലൈസൻസ് പുതുക്കിയത്.
കഴിഞ്ഞ മാർച്ച് 31-ന് ഹോം സ്റ്റേ ലൈസൻസിന്റെ കാലാവധി പൂർത്തിയായിരുന്നു. തുടർന്ന് അഞ്ചുവർഷത്തേയ്ക്ക് ലൈസൻസ് പുതുക്കി നൽകണമെന്ന് ആവശ്യപ്പെട്ട് എംഎൽഎ അപേക്ഷ നൽകി. ഇതിനായി പോലീസ് ക്ലിയറൻസ് സർട്ടിഫിക്കറ്റും മലിനീകരണ നിയന്ത്രണ ബോർഡിന്റെ എൻഒസിയും ഉൾപ്പെടെയുള്ള രേഖകൾ ഹാജരാക്കണമെന്ന് അധികൃതർ നിർദേശിച്ചിരുന്നു. ഡിസംബർ 31വരെ കാലാവധിയുള്ള മലിനീകരണ നിയന്ത്രണ ബോർഡിന്റെ സർട്ടിഫിക്കറ്റാണ് മാത്യു കുഴൽനാടൻ നൽകിയത്. ഇതുപ്രകാരമാണ് ലൈസൻസ് കാലവധി അനുവദിച്ചത്. ഹോംസ്റ്റേ ലൈസൻസ് പുതുക്കി നൽകിയതോടെ നികുതിയടയ്ക്കുന്നതിലുൾപ്പെടെ മാത്യു കുഴൽനാടന് ആശ്വാസമാകും.
മാത്യു കുഴൽനാടന്റെ റിസോർട്ട് അനധികൃതമായാണ് പ്രവർത്തിക്കുന്നതെന്ന് ആരോപിച്ച് സിപിഎം പ്രാദേശിക നേതൃത്വം രംഗത്തെത്തിയിരുന്നു. മാസപ്പടി വിവാദത്തിൽ മുഖ്യമന്ത്രിക്കും മകൾ വീണ വിജയനുമെതിരെ കുഴൽനാടൻ ആരോപണവുമായി രംഗത്ത് വന്നപ്പോഴും സിപിഎം മറുവാദമായി ഉന്നയിച്ചിരുന്നത് റിസോർട്ടും അതിന്റെ നിയമ ലംഘനങ്ങളുമായിരുന്നു.