കോഴിക്കോട്ടെ നിപ സംശയത്തില്‍ ആശങ്കപ്പെടേണ്ട സാഹചര്യമില്ലെന്ന് മന്ത്രി പി എ മുഹമ്മദ് റിയാസ്. രോഗലക്ഷണങ്ങളുള്ളവരുടെ സാമ്പിള്‍ പരിശോധനാ ഫലം വൈകീട്ടോടെ ലഭിക്കും. റിസല്‍ട്ട് പോസിറ്റീവ് ആയാലും നെഗറ്റീവ് ആയാലും മുന്‍കരുതലെടുത്തിട്ടുണ്ടെന്നും ജില്ലാ ഭരണകൂടം ജാഗ്രതയോടെ പ്രവര്‍ത്തിക്കുന്നുണ്ടെന്നും മുഹമ്മദ് റിയാസ് വ്യക്തമാക്കി. കുറ്റ്യാടിയില്‍ ചേര്‍ന്ന അവലോകന യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു മന്ത്രി.
രോഗലക്ഷണങ്ങള്‍ റിപ്പോര്‍ട്ട് ചെയ്ത മരുതോങ്കര, ആയഞ്ചേരി പഞ്ചായത്തുകളില്‍ ജാഗ്രത പാലിക്കുന്നുണ്ട്. അടുത്ത പഞ്ചായത്തുകളില്‍ പ്രശ്‌നങ്ങള്‍ ഇല്ല. 90 വീടുകളില്‍ നിലവില്‍ പരിശോധന നടത്തിയിട്ടുണ്ട്. രോഗലക്ഷണങ്ങള്‍ കണ്ടെത്തുന്നവരെ ഐസൊലേഷനിലേക്ക് മാറ്റാനുള്ള നടപടികളും എടുത്തു. മാസ്‌ക് നിര്‍ബന്ധം ആക്കിയിട്ടില്ലെങ്കിലും മാസ്‌ക് ധരിക്കുന്നതാണ് നല്ലത്. പരിശോധനാ ഫലം വന്നതിന് ശേഷം തുടര്‍നടപടിയെടുക്കുമെന്നും മന്ത്രി വ്യക്തമാക്കി.
നിലവില്‍ നിപ സംശയത്തോടെ നാല് പേരാണ് കോഴിക്കോട് ചികിത്സയില്‍ കഴിയുന്നത്. രോഗലക്ഷണങ്ങളുള്ളവരുമായി സമ്പര്‍ക്കം പുലര്‍ത്തിയ 75 പേര്‍ പ്രാഥമിക സമ്പര്‍ക്കപ്പട്ടികയിലുണ്ട്. ഇവരെയെല്ലാം ഐസോലേഷനിലേക്ക് മാറ്റാൻ ആരോഗ്യമന്ത്രിയുടെ നേതൃത്വത്തില്‍ കോഴിക്കോട് ചേര്‍ന്ന ഉന്നതതല യോഗത്തിൽ തീരുമാനമായിട്ടുണ്ട്. ആത്യാവശ്യമില്ലാത്തവര്‍ ആശുപത്രി സന്ദര്‍ശനം ഒഴിവാക്കണമെന്നാണ് ആരോഗ്യമന്ത്രിയുടെ നിര്‍ദേശം. സമ്പര്‍ക്കപ്പട്ടികയിലുള്ളവര്‍ക്കും രോഗലക്ഷണങ്ങളുള്ളവര്‍ക്കും ഐസൊലേഷന്‍ നടപടികള്‍ക്കുള്ള സംവിധാനം കോഴിക്കോട് മെഡിക്കല്‍ കോളേജിലാണ് സജ്ജീകരിച്ചിട്ടുണ്ട്.