മുസ്ലീം ലീഗിന്റെ മുന്നണി മാറ്റം സംബന്ധിച്ച് അഭ്യൂഹങ്ങളും, റിപ്പോര്‍ട്ടുകളും തുടരുന്നതിനിടെ നിലപാട് വ്യക്തമാക്കി സംസ്ഥാന അധ്യക്ഷന്‍ പാണക്കാട് സയ്യിദ് സാദിഖലി ശിഹാബ് തങ്ങള്‍. സ്ഥാപിത താത്പര്യങ്ങളുടെ പേരില്‍ ലീഗ് മുന്നണി വിട്ട ചരിത്രമില്ലെന്നും, ലീഗ് രാഷ്ട്രീയ ബന്ധങ്ങള്‍ ഉപയോഗപ്പെടുത്തിയത് സമൂഹ നന്മയ്ക്ക് വേണ്ടിയാണെന്നും അദ്ദേഹം വ്യക്തമാക്കുന്നു. മലപ്പുറത്ത് മുസ്ലീം ലീഗ് ജില്ലാ സമ്മേളനത്തിലായിരുന്നു സാദിഖലി ശിഹാബ് തങ്ങള്‍ നിലപാട് വ്യക്തമാക്കിയത്.

ലീഗ് ചരിത്രം സൃഷ്ടിച്ച പാർട്ടിയാണ്. പകല്‍ വെളിച്ചത്തില്‍ പറയേണ്ടത് പറയാന്‍ ലീഗിന് ഒരു മടിയുമില്ല. ഇരുളിന്റെ മറവില്‍ കൂടെയുള്ളവരെ വഞ്ചിക്കില്ലെന്നും സാദിഖലി തങ്ങള്‍ പറഞ്ഞു. ലീഗ് രാഷ്ട്രീയ ബന്ധം ഉപയോഗപ്പെടുത്തിയത് സമൂഹ നന്മയ്ക്ക് വേണ്ടി മാത്രമാണ്. ലീഗ് മുന്നണി വിടുകയാണെങ്കില്‍ അതിന് വ്യക്തമായ മാനദണ്ഡം ഉണ്ടാകുമെന്നും അദ്ദേഹം കൂട്ടിച്ചേർത്തു.

സ്വാതന്ത്ര്യത്തിന് മുന്‍പും അതിന് ശേഷവും നാടിന് വേണ്ടി പോരാടിയ പ്രസ്ഥാനം ഇന്ന് നിലനില്‍ക്കുന്നത് അഭിമാനകരമാണെന്ന് മുഖ്യപ്രഭാഷണത്തിനിടെ പി കെ കുഞ്ഞാലിക്കുട്ടിയും അഭിപ്രായപ്പെട്ടു. ബംഗാളില്‍ ഞങ്ങളോടൊപ്പം പ്രവര്‍ത്തിച്ച സിപിഎം ഇന്നവിടെ നാമവശേഷമായിരിക്കുന്നു. സിപിഎം ശോഷിച്ച സമയത്ത് ലീഗ് വളര്‍ന്നിട്ടേയുള്ളുവെന്നും കുഞ്ഞാലിക്കുട്ടി പറഞ്ഞു. ഒരു തരത്തിലുള്ള ആദര്‍ശ വ്യതിയാനവും സംഭവിച്ചിട്ടില്ലെന്നും എല്ലാ തലമുറയും ഞങ്ങളോടൊപ്പമുണ്ടെന്നും കുഞ്ഞാലിക്കുട്ടി പറഞ്ഞു.