കൊച്ചിന്‍ കാര്‍ണിവലിനോട് അനുബന്ധിച്ച് ഫോര്‍ട്ട് കൊച്ചിയില്‍ സ്ഥാപിച്ച പാപ്പാഞ്ഞിയുടെ മുഖം മാറ്റി. പുതുവര്‍ഷത്തലേന്ന് കത്തിക്കാന്‍ സ്ഥാപിച്ച പാപ്പാഞ്ഞിക്ക് പ്രധാനമന്ത്രി നരേന്ദ്ര മോദിയുടെ മുഖച്ഛായയെന്ന ആക്ഷേപവുമായി ബിജെപി പ്രവര്‍ത്തകര്‍ പ്രതിഷേധിച്ചിരുന്നു. തുടര്‍ന്നാണ് പഴയ മുഖം മാറ്റി പാപ്പാഞ്ഞിക്ക് പുതിയ മുഖമൊരുക്കിയത്. പാപ്പാഞ്ഞിയുടെ താടിയുടെ നീളം കൂട്ടി, മുഖത്ത് മാറ്റങ്ങള്‍ കൊണ്ടുവന്നു.
കഴിഞ്ഞ ദിവസമാണ് പാപ്പാഞ്ഞിയുടെ മുഖത്തിന് പ്രധാനമന്ത്രിയുടെ ഛായയുണ്ടെന്ന ആക്ഷേപവുമായി ബിജെപി പ്രവര്‍ത്തകര്‍ പ്രതിഷേധിച്ചത്. പാപ്പാഞ്ഞിയുടെ മുഖത്തിന് പ്രധാനമന്ത്രിയുമായി സാമ്യമുണ്ടെന്ന ചര്‍ച്ചകള്‍ സമൂഹമാധ്യമങ്ങളില്‍ സജീവമായതിന് പിന്നാലെയായിരുന്നു ബിജെപി പ്രതിഷേധം. പരേഡ് മൈതാനിയിലെത്തി പാപ്പാഞ്ഞിയുടെ നിര്‍മാണം നിര്‍ത്തിവെയ്ക്കണമെന്നും കാര്‍ണിവല്‍ കമ്മിറ്റി മാപ്പ് പറയണമെന്നും ബിജെപി പ്രവര്‍ത്തകര്‍ ആവശ്യപ്പെട്ടിരുന്നു.
പ്രതിഷേധം കനത്തതോടെ മുഖം മാറ്റാമെന്ന് കാര്‍ണിവല്‍ കമ്മിറ്റി ഉറപ്പു നല്‍കി. ഖേദം പ്രകടിപ്പിക്കുകയും ചെയ്തു. ആര്‍ക്കും പരാതിയുണ്ടാകരുതെന്ന് കരുതിയാണ് പാപ്പാഞ്ഞിക്ക് മാറ്റം വരുത്തിയതെന്നാണ് സംഘാടക സമിതിയുടെ വിശദീകരണം.