ചിന്നക്കനാൽ 301 കോളനിയിലെ ഒട്ടുമിക്ക വീടുകളുടെയും മുകളിൽ ഓലമേഞ്ഞ മറ്റൊരു വീടുണ്ട്. ആനയെ പേടിച്ച് ഇവിടെയുള്ളവർ രാത്രി ഉറങ്ങുന്നത് ഈ ഓലപ്പുരകളിലാണ്. നേരം വെളുക്കുന്നത് വരെ ശുചിമുറിയിൽ പോലും പോകാതെ സ്ത്രീകൾ ഉൾപ്പെടെയുള്ളവർ അതിനുള്ളില്‍ കഴിയും. വൈകുന്നേരം ആറ് മണി കഴിഞ്ഞാൽ വീട്ടിൽ നിന്ന് പുറത്തിറങ്ങാൻ പോലും കഴിയില്ല ഒരാൾക്കും.
അരിക്കൊമ്പനാണ് പ്രദേശത്ത് ഏറ്റവും അധികം അക്രമങ്ങൾ നടത്തുന്നത്. ചക്കക്കൊമ്പനേയും 301 കോളനിയിൽ സ്ഥിരമായി കാണാം. വൈകുന്നേരം ആറ് മണി കഴിയുമ്പോൾ വീടിന് മുകളിലെ ഷെഡ്ഡിൽ കഴിക്കാനുള്ള ഭക്ഷണവുമായി ആളുകൾ കയറും. രാവിലെ ഏഴ് മണിയായിട്ടേ തിരിച്ചിറങ്ങൂ. ഇതിനിടയിൽ ആന വരികയാണെങ്കില്‍ പടക്കം പൊട്ടിച്ചും, പാട്ടയിൽ കൊട്ടിയും, കല്ലെറിഞ്ഞുമൊക്കെ ഓടിച്ച് വിടും.