ബസ് ഓടിക്കുകയെന്ന കുട്ടിക്കാലം മുതലുള്ള ആഗ്രഹം 24ാം വയസില്‍ സഫലമാക്കിയിരിക്കുകയാണ് കോഴിക്കോട് മേപ്പയ്യൂര്‍ സ്വദേശി അനുഗ്രഹ. പേരാമ്പ്ര - വടകര റൂട്ടിലെ സ്വകാര്യബസിലെ ഡ്രൈവറായതോടെ നാട്ടുകാര്‍ക്കിടയില്‍ താരമാണ് അനുഗ്രഹയിപ്പോള്‍.
പിജി ലോജിസ്റ്റിക് പഠനത്തിന് ശേഷം രണ്ടുവര്‍ഷം അതേ മേഖലയില്‍ ജോലി ചെയ്തിട്ടുണ്ട് അനുഗ്രഹ. ആ ജോലി മതിയാക്കിയാണ് ബസ് ഡ്രൈവറാകാന്‍ ഇറങ്ങിത്തിരിച്ചത്. ഡ്രൈവങ്ങിനോടുള്ള ഇഷ്ടവും ബസ് ഓടിക്കണമെന്ന ആഗ്രഹവുമാണ് ഈ മേഖലയിലേക്ക് എത്തിച്ചത്. കഴിഞ്ഞ ഞായറാഴ്ചയാണ് ആഗ്രഹ സഫലീകരണം. മാതാപിതാക്കളുടെയും നാട്ടുകാരുടെയും പൂര്‍ണ പിന്തുണ അനുഗ്രഹയ്ക്കുണ്ട്.
ഡ്രൈവിങ് ഇഷ്ടമുള്ളവര്‍ ലിംഗഭേദമന്യ ഈ മേഖലയിലേക്ക് കടന്നുവരണമെന്നാണ് അനുഗ്രഹയുടെ പക്ഷം. ഒരു പുരുഷന്‍ ഓടിക്കുന്ന വാഹനത്തില്‍ എന്ത് ധൈര്യത്തോടെയാണോ ആളുകള്‍ കയറുന്നത് അതേ ധൈര്യത്തില്‍ സ്ത്രീ ഓടിക്കുന്ന വാഹനങ്ങളിലും കയറാമെന്നും അനുഗ്രഹ പറയുന്നു.