സിനിമ- ടിവി താരം സുബി സുരേഷ് അന്തരിച്ചു. കൊച്ചിയിലെ രാജഗിരി ആശുപത്രിയില്‍ രാവിലെ 9.35 ന് ഹൃദയാഘാതത്തെ തുടർന്നായിരുന്നു അന്ത്യം. കരള്‍ സംബന്ധമായ അസുഖത്തെ തുടര്‍ന്ന് കുറച്ചുനാളായി ചികിത്സയിലായിരുന്നു. 42കാരിയായ സുബിയെ കഴിഞ്ഞ മാസം അവസാനമാണ് ആശുപത്രിയില്‍ പ്രവേശിപ്പിച്ചത്. രോഗം ഗുരുതരമായതോടെ കരള്‍ മാറ്റിവെയ്ക്കുന്നതിനെക്കുറിച്ചും ആലോചിച്ചിരുന്നു. എന്നാല്‍ ആരോഗ്യസ്ഥിതി മോശമായതിനാല്‍ ശസ്ത്രക്രിയ നടന്നില്ല.
ടെലിവിഷന്‍ അവതാരകയെന്ന നിലയ്ക്ക് പ്രേക്ഷകർക്ക് സുപരിചിതയായ സുബി ഇരുപതോളം സിനിമകളിലും അഭിനയിച്ചിട്ടുണ്ട്. കോമഡി പ്രോഗ്രാമുകളിലൂടെ കുടുംബ സദസ്സുകള്‍ക്ക് പ്രിയങ്കരിയായ സുബി സ്ത്രീകള്‍ അധികം കടന്നുചെല്ലാത്ത കാലത്ത് മിമിക്രി വേദികളിലൂടെ താരമായി. എറണാകുളം ജില്ലയിലെ തൃപ്പൂണിത്തുറയില്‍ ജനിച്ച സുബി തൃപ്പൂണിത്തുറ സർക്കാർ സ്കൂളിലും എറണാകുളം സെയ്ന്റ് തെരേസാസ് കോളേജിലുമായാണ് പഠനം പൂർത്തിയാക്കിയത്. സ്റ്റേജ് പ്രോഗ്രാമുകളിലെ സ്ഥിരസാന്നിധ്യം കൂടിയായ സുബി കൊച്ചിന്‍ കലാഭവനിലൂടെയാണ് മുഖ്യധാരയിലേക്ക് വന്നത്.
ഇന്ന് രാജഗിരി ആശുപത്രിയിലെ മോർച്ചറിയില്‍ സൂക്ഷിക്കുന്ന മൃതദേഹം നാളെ സംസ്കരിക്കും.