കോണ്‍ഗ്രസിന്‍റെ ഉറച്ച സീറ്റുകളിലൊന്ന് എറണാകുളം ലോക്‌സഭാ മണ്ഡലം എന്നാണ് പ്രധാന വിശേഷണം. 2019ലെ കഴിഞ്ഞ ലോക്‌സഭാ തെരഞ്ഞെടുപ്പില്‍ കോണ്‍ഗ്രസിന്‍റെ ഹൈബി ഈഡന്‍ 1,69,053 വോട്ടുകളുടെ വമ്പിച്ച ഭൂരിപക്ഷത്തില്‍ വിജയിച്ച മണ്ഡലമാണ് എറണാകുളം. ഇത്തവണയും കോൺഗ്രസ് കളത്തിലിറക്കുന്നത് ഹൈബിയെ തന്നെയാണ്. ലത്തീൻ വോട്ടുകള്‍ ലക്ഷ്യമിട്ട് കെ ജെ ഷൈൻ എന്ന അധ്യാപികയെയാണ് സിപിഎം ഇത്തവണ കളത്തിലിറക്കുന്നത്. തൃപ്പൂണിത്തുറയിലും പറവൂരിലും വ്യക്തമായ സ്വാധീനമുള്ള ബിജെപി ഇത്തവണ വോട്ട് വിഹിതം ഒന്നര ലക്ഷത്തിനപ്പുറം കടത്തണമെന്ന ലക്ഷ്യത്തോടെ പിഎസ്‌സി മുന്‍ ചെയര്‍മാന്‍ കൂടിയായ ഡോ. കെ എസ് രാധാകൃഷ്ണനെയാണ് രംഗത്തിറക്കുന്നത്.
ഇത്തവണ മുൻ‌തൂക്കം കോൺഗ്രസിനും ഹൈബിക്കും ആണെങ്കിലും കെ ജെ ഷൈന്‍ എന്ന വനിതാ സ്ഥാനാര്‍ഥിയിലൂടെ സിപിഎമ്മിന്റെ കരുനീക്കം ഫലം കാണുമോ എന്ന് കണ്ടറിയണം.