അർബുദ കോശങ്ങളെ കണ്ടെത്താനും നശിപ്പിക്കാനുമുള്ള പുതിയ മാർഗം വികസിപ്പിച്ചെടുത്ത് ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് (ഐഐഎസ്‌സി) ശാസ്ത്രസംഘം. ശബ്ദതരംഗങ്ങൾ കൊണ്ട് അർബുദ കോശങ്ങളെ കണ്ടെത്താനും സ്വർണം, കോപ്പർ സൾഫൈഡ് എന്നിവയിൽനിന്ന് ഹൈബ്രിഡ് നാനോകണങ്ങൾ നിർമിച്ച് ഊഷ്മാവ് ഉപയോഗിച്ച് അവയെ നശിപ്പിക്കാനും കഴിയുമെന്നാണ് കണ്ടെത്തൽ. 'എസിഎസ് അപ്ലൈഡ് നാനോ മെറ്റീരിയൽസി'ൽ ആണ് പഠനം പ്രസിദ്ധീകരിച്ചിരിക്കുന്നത്.

നേരത്തെയുള്ള കണ്ടെത്തലും അനുസൃതമായ ചികിത്സയുമാണ് അർബുദത്തിനെതിരായ പോരാട്ടത്തിൽ പ്രധാനം. വികസിപ്പിച്ചെടുത്ത ഹൈബ്രിഡ് നാനോകണങ്ങൾ പ്രകാശം ആഗിരണം ചെയ്യുകയും ചൂട് സൃഷ്ടിക്കുകയും ചെയ്യുന്നു, ഇത് ക്യാൻസർ കോശങ്ങളെ നശിപ്പിക്കും. ചില അർബുദത്തെ തിരിച്ചറിയാനും നാനോകണങ്ങൾക്ക് സാധിക്കും.

ഇപ്പോഴുള്ള സിടി, എംആർഐ സ്കാനിങ് രീതികൾക്ക് ചിത്രം മനസ്സിലാക്കാൻ റേഡിയോളജി പ്രൊഫഷണലുകൾ ആവശ്യമാണ്. എന്നാൽ നാനോകണങ്ങളുടെ ഫോട്ടോകോസ്റ്റിക് സവിശേഷത, പ്രകാശം ആഗിരണം ചെയ്യാനും അൾട്രാസൗണ്ട് തരംഗങ്ങൾ സൃഷ്ടിക്കാനും സഹായിക്കും. കൂടുതൽ വൈരുദ്ധ്യമാർന്ന അർബുദ കോശങ്ങളെ കണ്ടെത്താനും ഇത് ഉപയോഗപ്രദമാണ്.

കോശങ്ങളിലൂടെ കടന്നുപോകുമ്പോൾ പ്രകാശത്തെ അപേക്ഷിച്ച് ശബ്ദതരംഗം ചിതറിപ്പോകുന്നതിനാൽ, കണങ്ങളിൽ സൃഷ്ടിക്കപ്പെടുന്ന അൾട്രാസൗണ്ട് കൂടുതൽ കൃത്യമായ ഇമേജ് റെസലൂഷൻ അനുവദിക്കും. ഇതുവഴി ലഭിക്കുന്ന സ്കാനുകൾക്ക് മികച്ച വ്യക്തത നൽകാനും ട്യൂമറിലെ ഓക്സിജൻ സാച്ചുറേഷൻ അളക്കാനും സാധിക്കും.

ഇതിനു മുൻപ് വികസിപ്പിച്ച നാനോകണങ്ങൾക്ക് വലുപ്പക്കൂടുതൽ കാരണം പരിമിതമായ ഉപയോഗങ്ങളാണുണ്ടായിരുന്നത്. നവീനമായ പരീക്ഷണത്തിലൂടെ സ്വർണത്തിന്റെ ചെറിയ കണികകൾ കോപ്പർ സൾഫൈഡ് പ്രതലത്തിൽ നിക്ഷേപിച്ച്, വിസ്താരം കുറഞ്ഞ ഹൈബ്രിഡ് നാനോകണങ്ങൾ നിർമിച്ചെടുക്കാം, ഇവയ്ക്ക് കോശങ്ങളിലേക്ക് എളുപ്പത്തിൽ സഞ്ചരിക്കാനും അതുവഴി ട്യൂമറുകളിൽ എത്താനും സാധിക്കും.

മനുഷ്യശരീരത്തിൽ അടിഞ്ഞുകൂടാതെ സ്വാഭാവികമായി പിന്തള്ളാൻ വലിപ്പം കുറഞ്ഞ നാനോകണങ്ങൾക്ക് സാധിക്കുമെന്നാണ് ഗവേഷകർ കരുതുന്നത്. എന്നാൽ ഇവയുടെ ഉപയോഗം ശരീരത്തിനുള്ളിൽ സുരക്ഷിതമാണോയെന്ന് ഉറപ്പിക്കാൻ വിപുലമായ പഠനങ്ങൾ നടന്നുവരികയാണ്.

ശ്വാസകോശ സംബന്ധമായ അർബുദത്തിനും സെർവിക്കൽ ക്യാൻസർ സെൽ ലൈനുകൾക്കുമാണ് നിലവിലെ പഠനത്തിലുള്ള നാനോകണങ്ങൾ പരീക്ഷിച്ചത്. ക്ലിനിക്കൽ വികസനങ്ങൾക്കായി ഫലങ്ങൾ ഉപയോഗപ്പെടുത്താനാണ് ഗവേഷകരുടെ പദ്ധതി.