ഇന്ത്യന്‍ ബാഡ്മിന്റണ്‍ സൂപ്പര്‍ താരം പിവി സിന്ധുവും യുവതാരം ലക്ഷ്യ സെന്നും കാനഡ ഓപ്പണ്‍ ബാഡ്മിന്റണ്‍ ചാമ്പ്യന്‍ഷിപ്പിന്റെ സെമിഫൈനലില്‍ കടന്നു. നിലവിലെ കോമണ്‍വെല്‍ത്ത് ജേതാവായ സിന്ധുവും ലക്ഷ്യയും തകര്‍പ്പന്‍ പ്രകടനവുമായാണ് കാനഡ ഓപ്പണ്‍ സൂപ്പര്‍ 500 സീരിസിന്റെ അവസാന നാലില്‍ കടന്നത്.

ഇന്നു നടന്ന ക്വാര്‍ട്ടറില്‍ ചൈനീസ് താരം ഗാവോ ഫാങ് ജിയെ നേരിട്ടുള്ള ഗെയിമുകള്‍ക്കു തോല്‍പിച്ചായിരുന്നു സിന്ധുവിന്റെ മുന്നേറ്റം. 21-13, 21-7 എന്ന സ്‌കോറിനായിരുന്നു സിന്ധുവിന്റെ ജയം. സെമിയില്‍ ലോക ഒന്നാം നമ്പര്‍ താരമായ ജപ്പാന്റെ അകാനെ യമാഗൂച്ചിയാണ് സിന്ധുവിന്റെ എതിരാളി.

മറ്റൊരു മത്സരത്തില്‍ ജര്‍മന്‍ യുവതാരം യൂലിയന്‍ കരാഗിക്കെതിരേയായിരുന്നു ലക്ഷ്യയുടെ ജയം. ഒന്നിനെതിരേ രണ്ടു ഗെയിമുകള്‍ക്കായിരുന്നു ലക്ഷ്യ സെന്നിന്റെ ജയം. സ്‌കോര്‍ 21-8, 17-21, 21-10. സെമിയില്‍ നാലാം സീഡ് ജപ്പാന്റെ കെന്റാ നിഷിമോറ്റോയാണ് സെന്നിന്റെ എതിരാളി.