നൂറ്റിമുപ്പത് കോടി ജനതയുടെ പ്രാര്‍ഥനകള്‍ തെറ്റിയില്ല. ബിര്‍മിങ്ഹാമിലെ ഭാരോദ്വഹന വേദിയില്‍ പൊന്‍പതക്കം ഉയര്‍ത്തി ഇന്ത്യയുടെ മീരാഭായ് ചാനു. വനിതകളുടെ 49 കിലോ വിഭാഗത്തില്‍ 201 കിലോ ഉയര്‍ത്തിയാണ് ചാനു സ്വര്‍ണമണിഞ്ഞത്. സ്നാച്ചില് ഗെയിംസ് റെക്കോഡോടെ 88 കിലോയും ക്ലീന്‍ ആന്‍ഡ് ജെര്‍ക്കില്‍ 113 കിലോയുമാണ് ചാനു ഉയര്‍ത്തിയത്. ഇതോടെ കോമണ്‍വെല്‍ത്ത് ഗെയിംസ് റെക്കോഡും സ്വന്തമാക്കാന്‍ ചാനുവിനായി.
റെക്കോഡ് സ്വര്‍ണം നേടിയെങ്കിലും തന്റെ കരിയറിലെ മികച്ച പ്രകടനം മറികടക്കാന്‍ ചാനുവിനായില്ല. 205 കിലോ ഉയര്‍ത്തിയതാണ് ചാനുവിന്റെ കരിയര്‍ ബെസ്റ്റ്. സ്നാച്ചില് 88 കിലോ എന്ന തന്റെ ദേശീയ റെക്കോഡിന് ഒപ്പമെത്തിയ ചാനുവിന് പക്ഷേ ക്ലീന്‍ ആന്‍ ജെര്‍ക്കില്‍ 119 കിലോ എന്ന തന്റെ ലോക റെക്കോഡും ബിര്‍മിങഹാമില്‍ മെച്ചപ്പെടുത്താനായില്ല.
27-കാരിയായ ചാനുവിന്റെ രണ്ടാം കോമണ്‍വെല്‍ത്ത് ഗെയിംസ് സ്വര്‍ണമാണിത്. 2018-ല്‍ ഓസ്‌ട്രേലിയയിലെ ഗോള്‍ഡ്‌കോസ്റ്റില്‍ നടന്ന ഗെയിംസിലും ചാനു സ്വര്‍ണമണിഞ്ഞിരുന്നു. അതിനു മുമ്പ് 2014-ല്‍ ഗ്ലാസ്‌ഗോയില്‍ വെള്ളിയും നേടിയിട്ടുണ്ട്.
ഇക്കഴിഞ്ഞ ടോക്യോ ഒളിമ്പിക്‌സിലെ വെള്ളി മെഡല്‍ ജേതാവാണ് ചാനു. 2017-ല്‍ അനാഹെയിമില്‍ നടന്ന ലോക ചാമ്പ്യന്‍ഷിപ്പില്‍ സ്വര്‍ണവും 2020-ല്‍ താ്ഷ്‌കന്റില്‍ നടന്ന ഏഷ്യന്‍ ചാമ്പ്യന്‍ഷിപ്പില്‍ വെങ്കലവും നേടിയ ചാനു ഉറച്ച സ്വര്‍ണപ്രതീക്ഷയോടെയാണ് ബിര്‍മിങ്ഹാമിലുമെത്തിയത്.