ഏഷ്യാ കപ്പ് ക്രിക്കറ്റ് ചാമ്പ്യന്‍ഷിപ്പില്‍ ഫൈനല്‍ കാണാതെ പുറത്തായവരുടെ മത്സരത്തില്‍ ഇന്ത്യ ഇന്ന് അഫ്ഗാനിസ്ഥാനെതിരേ. ദുബായിയില്‍ നടക്കുന്ന മത്സരത്തില്‍ ടോസ് നേടിയ അഫ്ഗാന്‍ നായകന്‍ മുഹമ്മദ് നബി ഇന്ത്യയെ ബാറ്റിങ്ങിനയച്ചു.
ഇന്നലെ നടന്ന നിര്‍ണായക മത്സരത്തില്‍ പാകിസ്താനെതിരേ പൊരുതിതോറ്റതോടെ അഫ്ഗാന്റെ ഫൈനല്‍ പ്രതീക്ഷ അസ്തമിച്ചിരുന്നു. സൂപ്പര്‍ ഫോറിലെ ആദ്യ രണ്ടു മത്സരങ്ങളും തോറ്റ ഇന്ത്യക്ക് പ്രതീക്ഷ പുലര്‍ത്തിയിരുന്നത് പാകിസ്താന്റെ തോല്‍വികളിലായിരുന്നു. ഇന്നലെ അതു പൊലിഞ്ഞതോടെ ഇന്ത്യക്കും പുറത്തേക്കുള്ള വാതില്‍ തുറന്നു.
ഇതോടെ ഇന്ന് ആശ്വാസ ജയം നേടി മടങ്ങാനാണ് ഇന്ത്യയുടെയും അഫ്ഗാന്റെയും ശ്രമം. സൂപ്പര്‍ ഫോറിലെ ആദ്യ രണ്ടു മത്സരങ്ങളില്‍ നിന്ന് വന്‍ മാറ്റങ്ങളുമായാണ് ഇന്ത്യ ഇന്നിറങ്ങുന്നത്. നായകന്‍ രോഹിത് ശര്‍മ, ഓള്‍റൗണ്ടര്‍ ഹാര്‍ദ്ദിക് പാണ്ഡ്യ, സ്പിന്നര്‍ യൂസ്‌വേന്ദ്ര ചഹാല്‍ എന്നിവര്‍ ഇന്ന് പുററത്തിരിക്കും.
ഇവര്‍ക്കു പകരം യഥാക്രമം ദിനേഷ് കാര്‍ത്തിക്, അക്‌സര്‍ പട്ടേല്‍, ദീപക് ചഹാര്‍ എന്നിവരാണ് ആദ്യ ഇലവനില്‍ ഇടംപിടിച്ചത്. അതേസമയം ഇന്നലെ പാകിസ്താനെതിരേ ഇറങ്ങിയ ടീമില്‍ നിന്നു മാറ്റമില്ലാതെയാണ് അഫ്ഗാന്‍ ഇന്നും മത്സരത്തിന് കച്ചമുറുക്കുന്നത്.