ബാറ്റര്‍മാരും ബൗളര്‍മാരും ഒരുപോലെ കളം നിറഞ്ഞപ്പോള്‍ കെ എല്‍ രാഹുലിന്റെ നേതൃത്വത്തിലിറങ്ങിയ ഇന്ത്യയ്ക്ക് സിംബാബ്‌വെയ്‌ക്കെതിരെ 10 വിക്കറ്റിന്റെ ഗംഭീര വിജയം. ഹരാരെയില്‍ നടന്ന ആദ്യ ഏകദിനത്തില്‍ സിംബാബ്‌വെയെ 189 റണ്‍സിന് എറിഞ്ഞിടാന്‍ ഇന്ത്യന്‍ ബൗളര്‍മാര്‍ക്ക് സാധിച്ചു.
30.5 ഓവറില്‍ വിക്കറ്റുകളൊന്നും നഷ്ടപ്പെടാതെ ഇന്ത്യ ആതിഥേയരുടെ സ്‌കോര്‍ മറികടന്നു. 72 ബോളില്‍ 82 റണ്‍സ് എടുത്ത ശുഭ്മാന്‍ ഗില്‍ അടിച്ചു തകര്‍ത്തപ്പോള്‍ 113 ബോളില്‍ 81 റണ്‍സ് നേടി ശിഖര്‍ ധവാനും ഇന്ത്യന്‍ വിജയത്തിന് തിളക്കം കൂട്ടി.
ആറുമാസത്തിന് ശേഷമുള്ള ദീപക് ചഹറിന്റെ തിരിച്ചുവരവില്‍ മൂന്ന് വിക്കറ്റാണ് എറിഞ്ഞിട്ടത്. തന്റെ തുടര്‍ച്ചയായ ഓവറുകളിലൂടെ സിംബാബ്‌വെയുടെ ഓപ്പണിങ് നിരയെ തന്നെ ചഹര്‍ തകര്‍ത്തു. മൂന്ന് വിക്കറ്റുകള്‍ വീതം നേടി പ്രസിദ് കൃഷ്ണയും അക്‌സര്‍ പട്ടേലും ഒരു വിക്കറ്റ് നേടി സിറാജും ആതിഥേയരെ നിലംപരിശാക്കി.
ടോസ് നേടി ബൗളിങ് തിരഞ്ഞെടുത്ത ഇന്ത്യ തുടക്കം മുതല്‍ തന്നെ സിംബാബ്‌വെയെ പ്രതിസന്ധിയിലാക്കി. ആദ്യത്തെ അഞ്ച് വിക്കറ്റ് നഷ്ടപ്പെട്ടപ്പോള്‍ സിംബാബ്‌വെയുടെ സ്‌കോര്‍ 66 എന്ന നിലയിലായിരുന്നു. ചകാബ്വ 35 റണ്‍സെടുത്ത് തിരിച്ചു വരവിന് ശ്രമിച്ചെങ്കിലും അക്‌സറിന്റെ കെണിയില്‍ കുടുങ്ങി.
എട്ട് ഓവറില്‍ 110 റണ്‍സ് എന്ന നിലയിലിരുന്ന സിംബാബ്‌വെയെ 65 പന്തുകളില്‍ 70 റണ്‍സ് എന്ന കൂട്ടുകെട്ടിലൂടെ മാന്യമായ സ്‌കോറിലെത്തിച്ചത് ബ്രാഡ് ഇവാന്‍സും റിച്ചാര്‍ഡ് നഗാരവയുമാണ്. അവര്‍ മടങ്ങിയതിന് ശേഷം ക്രീസില്‍ എത്തിയവര്‍ക്കൊന്നും ഇന്ത്യന്‍ ബൗളര്‍മാര്‍ക്ക് മുന്നില്‍ പിടിച്ചു നില്‍ക്കാന്‍ കഴിഞ്ഞില്ല. 40.3 ഓവറില്‍ അക്‌സര്‍ അവസാനവിക്കറ്റും എടുത്തതോടെ സിംബാബ്‌വെ പരാജയത്തിലേക്ക് വീഴുകയായിരുന്നു.