ഇന്ത്യന്‍ പ്രീമിയര്‍ ലീഗ് ക്രിക്കറ്റില്‍ ഇന്നു നടക്കുന്ന മത്സരത്തില്‍ സണ്‍റൈസേഴ്‌സ് ഹൈദരാബാദിനെതിരേ മുംബൈ ഇന്ത്യന്‍സിന് ബാറ്റിങ്. സ്വന്തം തട്ടകമായ ഹൈദരാബാദ് ഉപ്പാല്‍ സ്‌റ്റേഡിയത്തില്‍ ടോസ് നേടിയ സണ്‍റൈസേഴ്‌സ് നായകന്‍ എയ്ഡന്‍ മര്‍ക്രം ബൗളിങ് തെരഞ്ഞെടുക്കുകയായിരുന്നു.
ആദ്യ രണ്ടു മത്സരങ്ങളിലെ തോല്‍വിക്കു ശേഷം തുടരെ രണ്ടു മത്സരങ്ങള്‍ ജയിച്ചു ഫോമില്‍ തിരിച്ചെത്തിയ രണ്ടു ടീമുകള്‍ ഏറ്റുമുട്ടുന്ന മത്സരം ആവേശകരമാകുമെന്നാണ് ആരാധകര്‍ പ്രതീക്ഷിക്കുന്നത്. കഴിഞ്ഞ മത്സരത്തില്‍ കൊല്‍ക്കത്ത നൈറ്റ് റൈഡേഴ്‌സിനെ തോല്‍പിച്ചാണ് ഇരുടീമുകളും ഇന്ന് നേര്‍ക്കുനേര്‍ ഇറങ്ങുന്നത്. മുംബൈ അഞ്ചു വിക്കറ്റിന് കെ.കെ.ആറിനെ വീഴ്ത്തിയപ്പോള്‍ സണ്‍റൈസേഴ്‌സിന്റെ ജയം 23 റണ്‍സിനായിരുന്നു.
കഴിഞ്ഞ മത്സരത്തില്‍ കളിച്ച ടീമില്‍ നിന്ന് ഇരുടീമുകളും മാറ്റം വരുത്തിയിട്ടുണ്ട്. മുംബൈ നിരയില്‍ നായകന്‍ രോഹിത് ശര്‍മ തിരിച്ചെത്തിയപ്പോള്‍ റിലി മെറിഡിത്ത് പുറത്തുപോയി. യുവ പേസര്‍ ഡുവാന്‍ യാന്‍സെനെയും പുറത്തിരുത്തിയ മുംബൈ പേസര്‍ ജേസന്‍ ബെഹ്‌റന്‍ഡോര്‍ഫിനെ തിരികെ എത്തിച്ചു. യുവതാരം അര്‍ജുന്‍ തെണ്ടുല്‍ക്കര്‍ സ്ഥാനം നിലനിര്‍ത്തി.
സണ്‍റൈസേഴ്‌സ് നിരയില്‍ പേസര്‍ ഉമ്രാന്‍ മാലിക്കിനാണ് സ്ഥാനം നഷ്ടമായത്. മാലിക്കിനു പകരം സ്പിന്‍ ഓള്‍റൗണ്ടര്‍ വാഷിങ്ടണ്‍ സുന്ദര്‍ ടീമില്‍ ഇടംനേടി. നിലവില്‍ പോയിന്റ് പട്ടികയില്‍ നാലു മത്സരങ്ങളില്‍ നിന്ന് നാലു പോയിന്റുമായി മുംബൈ എട്ടാമതും സണ്‍റൈസേഴ്‌സ് ഒമ്പതാമതുമാണ്.