ഇംഗ്ലണ്ട് എ ടീമിനെതിരായ ടി20 പരമ്പരയ്ക്കുള്ള ഇന്ത്യൻ എ ടീമിനെ മലയാളി താരം മിന്നു മണി നയിക്കും. പരമ്പരയ്ക്കുള്ള ഇന്ത്യൻ വനിതാ ടീമിനെ ബിസിസിഐ നേരത്തേ പ്രഖ്യാപിച്ചിരുന്നു. മൂന്ന് മത്സരങ്ങളടങ്ങിയ പരമ്പര മുംബൈ വാങ്കഡെ സ്റ്റേഡിയത്തിലാണ് നടക്കുക. നവംബർ 29, ഡിസംബർ ഒന്ന്, മൂന്ന് തിയതികളിലായിട്ടാണ് മത്സരം നിശ്ചയിച്ചിരിക്കുന്നത്.

വയനാട് മാനന്തവാടി സ്വദേശിയായ മിന്നു ഇന്ത്യൻ ജേഴ്സിയിലെത്തുന്ന ആദ്യ മലയാളി വനിതാ താരം കൂടിയാണ്.

ജൂലൈയിൽ നടന്ന ബംഗ്ലാദേശിനെതിരായ ടി20 പരമ്പരയിലൂടെയാണ് മിന്നുവിന്റെ അന്താരാഷ്ട്ര അരങ്ങേറ്റം. ഇതുവരെ നാല് ടി20 മത്സരങ്ങളിൽ ഭാഗമായിട്ടുണ്ട്. 2019ൽ ബംഗ്ലദേശിൽ പര്യടനം നടത്തിയ ഇന്ത്യൻ എ ടീമിലും അംഗമായിരുന്നു. അടുത്തിടെ നടന്ന ഹാങ്‌ഷൗ ഏഷ്യൻ ഗെയിംസിൽ സ്വർണം നേടിയ ഇന്ത്യൻ വനിതാ ടീമിലും മിന്നു കളിച്ചിരുന്നു.

ബംഗ്ലാദശിനെതിരായ മത്സരത്തിൽ അന്താരാഷ്ട്ര അരങ്ങേറ്റ പരമ്പരയിൽ തന്നെ അഞ്ച് വിക്കറ്റുകൾ മിന്നുമണി സ്വന്തമാക്കിയിരുന്നു.

പതിനാറാം വയസ്സിലാണ് മിന്നു കേരള ക്രിക്കറ്റ് ടീമിലെത്തുന്നത്. 10 വർഷമായി കേരള ടീമിലെ അംഗമാണ്. ഓഫ് സ്പിന്നറായ മിന്നുമണി മികച്ച ഓൾറൗണ്ടർ കൂടിയാണ്.

ഇന്ത്യ എ ടീം: മിന്നു മണി, കനിക അഹൂജ, ഉമ ചേത്രി, ശ്രേയങ്ക പാട്ടീല്‍, ഗൊങ്കടി തൃഷ, വൃന്ദ ദിനേശ്, ഗ്‌നാനന്ദ ദിവ്യ, അരുഷി ഗോയല്‍, അനുഷ ബരേഡി, മോണിക്ക പട്ടേല്‍, കാഷ്വീ ഗൗതം, ജിന്‍ഡിമമി കലിത, പ്രകാശിത് നായ്ക്, ദിഷ കസട്, രാഷി കനോജിയ, മന്നത് കശ്യപ്.