കാൽമുട്ടിനേറ്റ പരുക്കിനെത്തുടർന്ന് പൃഥ്വി ഷാ ആഭ്യന്തര ക്രിക്കറ്റിൽ നിന്ന് വിട്ട് നിൽക്കും. കുറഞ്ഞത് മൂന്നു മാസമെങ്കിലും കളിക്കളത്തിൽ നിന്ന് വിട്ട് നിൽക്കാനാണ് സാധ്യത. ഇതേതുടർന്ന് രാജ്‌കോട്ടിൽ ഒക്‌ടോബർ ഒന്നിന് നടക്കുന്ന ഇറാനി കപ്പ് താരത്തിന് നഷ്ടമാകുമെന്ന് ഉറപ്പായി. പരുക്കിനെ തുടർന്ന് കൂടുതൽ പരിശോധനകൾക്കായി പൃഥ്വി ഷാ ബെംഗളൂരുവിലെ എൻസിഎയിലേക്ക് മടങ്ങി. ശസ്ത്രക്രിയ വേണ്ടിവരുമെന്നാണ് സൂചന.
ഡർഹാമിനെതിരായ ഏകദിന ചാമ്പ്യൻഷിപ്പ് മത്സരത്തിൽ നോർത്താംപ്ടൺഷെയറിന് വേണ്ടി കളിക്കുന്നതിനിടെയാണ് ഷായ്ക്ക് പരുക്കേറ്റത്. തുടർന്നു നടത്തിയ പരിശോധനകളിൽ പരുക്ക് പ്രതീക്ഷിച്ചതിനെക്കാളും ഗുരുതരമാണെന്ന് കണ്ടെത്തി. ഇതേത്തുടർന്നാണ് താരത്തിന് ഡോക്ടർമാർ വിശ്രമം നിർദേശിക്കുകയായിരുന്നു. ഇതോടെ ഒക്‌ടോബർ 16-ന് ആരംഭിക്കുന്ന സയ്യിദ് മുഷ്താഖ് അലി ട്രോഫിയിലും പൃഥ്വി കളിക്കില്ലെന്ന് ഉറപ്പായി.
സോമർസെറ്റിനെതിരെ 153 പന്തിൽ 244 റൺസ് നേടി നേടുകയും നാല് മത്സരങ്ങളിൽ നിന്നായി 429 റൺസ് നേടി ഏകദിന മത്സരത്തിൽ ഏറ്റവും കൂടുതൽ റൺസ് നേടുകയും ചെയ്ത് മെച്ചപ്പെട്ട പ്രകടനം കാഴ്ച വച്ച സമയത്തായിരുന്നു ഷായുടെ പരുക്ക്.