കാണ്‍പൂര്‍ ടെസ്റ്റില്‍ ഇന്ത്യയ്ക്ക് ഉജ്ജ്വല ജയം. രണ്ടാം ടെസ്റ്റില്‍ ബംഗ്ലാദേശിനെ ഏഴ് വിക്കറ്റിന് തകര്‍ത്താണ് ഇന്ത്യയുടെ വിജയം. ഇതോടെ രണ്ട് മത്സരങ്ങളുള്ള സീരിസും ഇന്ത്യ സ്വന്തമാക്കി. രണ്ടാം ഇന്നിങ്ങ്‌സില്‍ ബംഗ്ലാദേശ് ഉയര്‍ത്തിയ 95 റണ്‍സിന്റെ ലക്ഷ്യം പിന്തുടര്‍ന്ന ഇന്ത്യ 17.2 ഓവറില്‍ മൂന്നു വിക്കറ്റ് നഷ്ടത്തില്‍ വിജയത്തിലെത്തി. യശസ്വി ജയ്‌സ്വാള്‍ രണ്ടാം ഇന്നിങ്‌സിലും സ്വന്തമാക്കിയ അര്‍ധ സെഞ്ച്വറിയുടെ മികവിലാണ് ഇന്ത്യയുടെ ജയം. 45 പന്തില്‍ 51 റണ്‍സാണ് ജയ്‌സ്വാളിന്റെ പങ്ക്. വിരാട് കോലി (37), ഋഷഭ് പന്ത് ( നാല്) ചേര്‍ന്നാണ് ടീം ഇന്ത്യയ്ക്കായി വിജയ റണ്‍സ് കുറിച്ചത്. ക്യാപ്റ്റന്‍ രോഹിത് ശര്‍മയും (8), ശുഭ്മന്‍ ഗില്‍ (6) എന്നിവരാണ് രണ്ടാം ഇന്നിങ്‌സില്‍ ഇന്ത്യയ്ക്കായി സ്‌കോര്‍ ചെയ്ത മറ്റ് രണ്ട് താരങ്ങള്‍.

മഴ കാരണം രണ്ടു ദിവസം ഒരു പന്തു പോലും എറിയാന്‍ സാധിക്കാതിരുന്ന കളിയില്‍ ഒന്നാം ഇന്നിങ്ങ്‌സില്‍ ബംഗ്ലാദേശ് ഉയര്‍ത്തിയ 233 റണ്‍സിനെതിരെ 9 വിക്കറ്റ് നഷ്ടത്തില്‍ 285 ഡിക്ലയര്‍ ചെയ്തിരുന്നു. തുടര്‍ന്ന രണ്ടാം ഇന്നിങ്‌സിന് ഇറങ്ങിയ ബംഗ്ലദേശ് 146 കൂട്ടിച്ചേര്‍ക്കുന്നതിനിടെ പുറത്താവുകയും ചെയ്തു. ബംഗ്ലാദേശ് നേടിയ 95 റണ്‍സിന്റെ ലീഡ് ഇന്ത്യ അനായാസം മറികടക്കുകയായിരുന്നു. ആദ്യ ഇന്നിങ്‌സില്‍ ഇന്ത്യ നടത്തിയ ബാറ്റിങ് വെടിക്കെട്ടാണ് മത്സരഗതി മാറ്റിമറിച്ചത്.

ചെന്നൈയില്‍ നടന്ന ആദ്യ ടെസ്റ്റില്‍ ഇന്ത്യ 280 റണ്‍സ് വിജയം നേടിയിരുന്നു. രണ്ടാം വിജയത്തോടെ പരമ്പര 20ന് ഇന്ത്യ സ്വന്തമാക്കി.