ദക്ഷിണാഫ്രിക്കെതിരായ എകദിന പരമ്പരയ്ക്കുള്ള ടീമിനെ പ്രഖ്യാപിച്ചപ്പോള്‍ പലരും ഒന്ന് അമ്പരന്നു. ആരാണ് ടീമിലിടം നേടിയ മുകേഷ് കുമാർ. എന്നാല്‍ ആരാധകരെക്കാള്‍ ഞെട്ടിയത് മുകേഷ് കുമാർ തന്നെയാണ്. മറ്റൊന്നും കൊണ്ടല്ല. ടീമിന്റെ വാട്സ് ആപ് ഗ്രൂപ്പില്‍ ചേർത്തപ്പോഴാണ് ഇന്ത്യൻ ടീമില്‍ ഇടം ലഭിച്ച വിവരം മുകേഷ് കുമാർ അറിയുന്നത്. മുകേഷ് തന്നെയാണ് ഈ വിവരം മാധ്യമങ്ങളോട് പങ്കുവെച്ചതും.
സമീപകാലത്ത് ഐപിഎല്ലിലൂടെ അല്ലാതെ ഇന്ത്യൻ ടീമിലേക്ക് എത്തുന്ന താരം കൂടെയാണ് മുകേഷ് കുമാർ. അടുത്തിടെ സമാപിച്ച ഇന്ത്യ എ യുടെ ന്യൂസീലാന്റിനെതിരെയുള്ള അനൗദ്യോഗിക ചതുർദിന മത്സരത്തിൽ ഒൻപത് വിക്കറ്റ് നേടിയതോടെയാണ് ഇന്ത്യൻ ടീമിലേക്കുള്ള വാതിൽ മുകേഷിന് തുറന്നത്. ബംഗാളിനായി ഫസ്റ്റ് ക്ലാസ് മത്സരത്തിൽ കളിക്കുന്ന താരം കഴിഞ്ഞ രഞ്ജി സീസണിൽ ബംഗാളിനായി കൂടുതൽ വിക്കറ്റ് നേടിയ താരങ്ങളിലൊരാളായിരുന്നു. ഒൻപത് ഇന്നിങ്‌സുകളിൽ നിന്നായി 20 വിക്കറ്റുകളും മുകേഷ് നേടി. ഇപ്പോൾ നടന്നുകൊണ്ടിരിക്കുന്ന ഇറാനി ട്രോഫിയിൽ സൗരാഷ്ട്രയ്ക്കെതിരെ ആദ്യ ഇന്നിങ്സിൽ നാല്‌ വിക്കറ്റും, രണ്ടാമിന്നിങ്സിൽ ഇതുവരെ ഒരു വിക്കറ്റും നേടിയിട്ടുണ്ട്.
2015ൽ ഹരിയാനയ്‌ക്കെതിരെയാണ് താരത്തിന്റെ ഒന്നാംക്ലാസ് ക്രിക്കറ്റിലേക്കുള്ള അരങ്ങേറ്റം. 31 കളികളിൽ നിന്നായി 113 വിക്കറ്റുകൾ നേടിയിട്ടുണ്ട്.