വനിതാ പ്രീമിയര്‍ ലീഗ് ആരാധകര്‍ക്ക് സന്തോഷവാര്‍ത്തയുമായി ബിസിസിഐ. ഹോം- എവേ ഫോര്‍മാറ്റുകളുമായി വനിതാ പ്രിമിയര്‍ ലീഗ് ഇനി ഐപിഎല്ലിന്റെ പാത പിന്തുടരും. ഡബ്ല്യൂപിഎല്ലിന്റെ രണ്ടാം സീസണ്‍ മിക്കവാറും ഫെബ്രുവരിയോടെ ഉണ്ടാകുമെന്നാണ് റിപ്പോര്‍ട്ട്. ടൂര്‍ണമെന്റിന്റെ രണ്ടാം പതിപ്പ് മാര്‍ച്ച് 4 മുതല്‍ 26 വരെ മുംബൈയിലെ രണ്ട് വേദികളില്‍ മാത്രമായാണ്‌ നടന്നത്.
ആരാധകരെ ആകര്‍ഷിക്കുന്നത് പ്രധാനമായതിനാല്‍ ഹോം എവേ മത്സരങ്ങള്‍ നടത്തുമെന്ന് ഐപിഎല്‍ ചെയര്‍മാന്‍ അരുണ്‍ ധുമല്‍ ഈ മാസം ആദ്യം അറിയിച്ചിരുന്നു
അടുത്ത മൂന്ന് സീസണുകളില്‍ അഞ്ച് ടീമുകളുടെ ടൂര്‍ണമെന്റായി തന്നെയാകും വനിതാ പ്രീമിയര്‍ ലീഗ് മുന്നോട്ട് പോവുക. ആരാധകരെ ആകര്‍ഷിക്കുന്നത് പ്രധാനമായതിനാല്‍ ഹോം എവേ മത്സരങ്ങള്‍ നടത്തുമെന്ന് ഐപിഎല്‍ ചെയര്‍മാന്‍ അരുണ്‍ ധുമല്‍ ഈ മാസം ആദ്യം അറിയിച്ചിരുന്നു. എന്നാല്‍ അതിന്റെ പേരില്‍ ഫ്രാഞ്ചൈസി ഇല്ലാത്ത ഇന്‍ഡോര്‍ പോലുള്ള രണ്ടാം നിര നഗരങ്ങളിലേക്ക് ലീഗിനെ കൊണ്ട് പോകുന്നത് ബുദ്ധിമുട്ടാണെന്ന് ബിസിസിഐ വൃത്തങ്ങള്‍ അറിയിച്ചു.
ദീപാവലിയോട് അനുബന്ധിച്ച് വര്‍ഷാവസാനത്തേക്ക് ടൂര്‍ണമെന്റ് മാറ്റിവയ്ക്കുന്നത് ഉള്‍പ്പെടെയുള്ള കാര്യങ്ങളും പരിഗണനയിലുണ്ട്. തീരുമാനങ്ങളൊന്നും അന്തിമമായിട്ടില്ല. ചര്‍ച്ചകള്‍ നടന്നുകൊണ്ടിരിക്കുകയാണ്. വര്‍ഷത്തില്‍ രണ്ടുതവണ ഐപിഎല്‍ നടത്തുന്നത് വെല്ലുവിളിയാകുമെന്ന് ധുമാല്‍ അടുത്തിടെ പ്രതികരിച്ചതിന് പിന്നാലെയാണ് ഊഹാപോഹങ്ങള്‍.