ഡ്യൂറൻഡ് കപ്പില്‍ കേരള ബ്ലാസ്റ്റേഴ്‌സ് സെമി ഫൈനല്‍ കാണാതെ പുറത്ത്. ക്വാർട്ടർ ഫൈനലില്‍ ബെംഗളൂരു എഫ് സിയോട് പരാജയപ്പെട്ടു. എതിരില്ലാത്ത ഒരു ഗോളിലായിരുന്നു ബെംഗളൂരുവിന്റെ ജയം. മത്സരത്തിന്റെ അധികസമയത്തിന്റെ അവസാന നിമിഷം പെരെയ്‌ര ഡയാസ് നേടിയ ഗോളാണ് ബെംഗളൂരുവിനെ സെമിയിലെത്തിച്ചത്. സുനില്‍ ഛേത്രിയായിരുന്നു വിജയഗോളിന് വഴിയൊരുക്കിയത്
പന്തടക്കത്തിലും ആക്രമണത്തിലുമെല്ലാം ബ്ലാസ്റ്റേഴ്‌സിനേക്കാള്‍ മികവ് പുലർത്താൻ മത്സരത്തിലുടനീളം ബെംഗളൂരുവിന് സാധിച്ചിരുന്നു. 62 ശതമാനം പന്തടക്കം ബെംഗളൂരു നിലനിർത്തി. 16 തവണ ബ്ലാസ്റ്റേഴ്‌സിന്റെ പോസ്റ്റിലേക്ക് ഷോട്ടുതിർത്തു. അഞ്ച് ഷോട്ടുകള്‍ ടാർഗെറ്റിലെത്തിക്കാനുമായി. മറുവശത്ത് എട്ട് ഷോട്ടുകള്‍ മാത്രമാണ് ബ്ലാസ്റ്റേഴ്‌സിന് തൊടുക്കാനായത്. മൂന്നെണ്ണം ടാർഗറ്റിലുമെത്തി.
ആദ്യ പകുതിയില്‍ ലഭിച്ച അവസരങ്ങള്‍ ഉപയോഗിക്കാൻ ബ്ലാസ്റ്റേഴ്‌സിന് സാധിക്കാതെ പോയത് തിരിച്ചടിയായി. നാലാം മിനുറ്റില്‍ തന്നെ ഗോളി സോം കുമാറിനെ ബ്ലാസ്റ്റേഴ്‌സിന് നഷ്ടമായിരുന്നു. പകരം സച്ചിൻ സുരേഷാണ് കളത്തിലെത്തിയത്. മികച്ച ഫോമിലുള്ള പെപ്രയുടേയും നോഹയുടേയും ഷോട്ടുകള്‍ക്ക് ബെംഗളൂരു ഗോളി ഗുർപ്രീതിനെ മറികടക്കാനാകാതെ പോയി.
95-ാം മിനുറ്റിലായിരുന്നു ഡയാസിന്റെ ഗോള്‍ വന്നത്. മുൻ ബ്ലാസ്റ്റേഴ്‌സ് താരം കൂടിയായ ഡയാസ് വോളിയിലൂടെയാണ് പന്ത് വലയിലെത്തിച്ചത്. ടൂർണമെന്റിലെ ഡയാസിന്റെ നാലാം ഗോളാണിത്. സെമി ഫൈനലില്‍ കരുത്തരായ മോഹൻ ബഗാനാണ് ബെംഗളൂരുവിന്റെ എതിരാളികള്‍.