ഇരുപത്തിരണ്ടാമത് കോമണ്‍വെല്‍ത്ത് ഗെയിംസില്‍ വീണ്ടും മലയാളപ്പെരുമ. പുരുഷന്മാരുടെ ട്രിപ്പിള്‍ ജമ്പില്‍ ഇന്ത്യക്കായി സ്വര്‍ണവും വെള്ളിയും കൊയ്തു എല്‍ദോസ് പോളും അബ്ദുള്ള അബൂബക്കറും കേരളത്തിന്റെ അഭിമാനതാരകങ്ങളായി.
ഇന്നു നടന്ന ഫൈനലില്‍ 17.03 മീറ്റര്‍ ചാടിയാണ് എല്‍ദോസ് പോള്‍ സ്വര്‍ണമണിഞ്ഞത്. നേരിയ വ്യത്യാസത്തില്‍ 17.02 മീറ്ററില്‍ ചാടിവീണ അബ്ദുള്ള വെള്ളിയും സ്വന്തമാക്കി. 16.92 മീറ്റര്‍ കണ്ടെത്തിയ ബെര്‍മുഡയുടെ ജാ ന പെരിന്‍ഷീഫിനാണ് വെങ്കലം.
ഇതാദ്യമായാണ് ഈ ഇനത്തില്‍ ഇന്ത്യ ഇരട്ടമെഡല്‍ സ്വന്തമാക്കുന്നത്. മറ്റൊരു ഇന്ത്യന്‍ താരം പ്രവീണ്‍ ചിത്രവേല്‍ നാലാം സ്ഥാനത്ത് എത്തി.
കോതമംഗലം എംഎ കോളേജില്‍ ടി പി ഔസേഫിന് കീഴിലൂടെയായിരുന്നു എല്‍ദോസിന്റെ തുടക്കം. പിന്നീട് ബംഗളൂരു സായിയില്‍ എം ഹരികൃഷ്ണന് കീഴിലായി പരിശീലനം. ഇന്ത്യന്‍ നേവി ഉദ്യോഗസ്ഥനാണ് ഈ ഇരുപത്തഞ്ചുകാരന്‍. എറണാകുളം സ്വദേശിയാണ്.