ഇന്ത്യന്‍ സൂപ്പര്‍ ലീഗ് ഫുട്‌ബോളില്‍ ഇന്നു നടന്ന രണ്ടാം എലിമിനേറ്ററില്‍ ഒഡീഷ എഫ്.സിയെ ആധികാരികമായി തോല്‍പിച്ച് എ.ടി.കെ. മോഹന്‍ ബഗാന് സെമിയില്‍ കടന്നു. സ്വന്തം തട്ടകമായ സാള്‍ട്ട്‌ലേക്ക് സ്‌റ്റേഡിയത്തില്‍ നടന്ന മത്സരത്തില്‍ എതിരില്ലാത്ത രണ്ടു ഗോളുകള്‍ക്കായിരുന്നു ബഗാന്റെ ജയം. ഇതോടെ 2022-23 സീസണിന്റെ സെമി ലൈനപ്പും വെളിവായി.
ആദ്യ സെമിയില്‍ മുംബൈ സിറ്റി എഫ്.സിയും ബംഗളുരു എഫ്.സിയും ഏറ്റുമുട്ടുമ്പോള്‍ രണ്ടാം സെമിയില്‍ ബഗാന് എതിരാളികള്‍ നിലവിലെ ജേതാക്കളായ ഹൈദരാബാദ് എഫ്.സിയാണ്. ഈ മാസം 12-നാണ്് ആദ്യ സെമിയുടെ ആദ്യപാദം അരങ്ങേറുക.
ഇന്നു കൊല്‍ക്കത്തയില്‍ നടന്ന മത്സരത്തില്‍ ഐ.എസ്.എല്‍ ചരിത്രത്തില്‍ ഒഡീഷയോട് ഒരിക്കലും പരാജയപ്പെട്ടിട്ടില്ല എന്ന റെക്കോഡ് കാത്തു സൂക്ഷിക്കാനും ബഗാനായി. 36-ാം മിനിറ്റില്‍ ഹ്യൂഗോ ബൗമാസിന്റെയും 58-ാം മിനിറ്റില്‍ ദിമിത്രി പെട്രാറ്റോസിന്റെയും ഗോളുകളാണ് അവര്‍ക്ക് ജയമൊരുക്കിയത്.
ഇന്നലെ നടന്ന മത്സരത്തില്‍ നായകന്‍ സുനില്‍ ഛേത്രി നേടിയ വിവാദ ഗോളില്‍ കേരള ബ്ലാസ്റ്റേഴ്‌സിനെ പുറത്താക്കിയാണ് ബംഗളൂരു സെമിയില്‍ എത്തിയത്.